Іс-шараны ҚР Мәдениет және ақпарат министрлігі БАҚ саласындағы мемлекеттік саясат департаментінің директоры Қайнар Ахетов ашып, қазіргі журналистиканың қарқынды өзгеріп жатқанын, соған сай медиасаясат пен мемлекеттік органдардың ақпараттық байланысы да жаңа деңгейге көтерілуі керектігін атап өтті.

Мұнан соң арнайы шақырылған спикерлер таңдаған тақырыптарына сай қатысушылар алдында баяндама жасады. Өңірлік коммуникациялар қызметінің директоры Алмат Сәдуақас «Мемлекеттік органдар мен БАҚ-тың өзара іс-қимылы: тиімділігі мен ашықтығы» тақырыбы аясында ақпарат таратудағы ашықтық пен сенімділік туралы ой қозғады.

– Өздеріңіз білетіндей қазіргі қоғам нақты әрі уақытылы ақпаратты қажет етеді. Ал бұл қажеттілікті өтеуде бұқаралық ақпарат құралдары мен мемлекеттік құрылымдардың өзара үйлесімді жұмысы шешуші рөл атқарады. Осы тұста өңірлік коммуникациялар қызметі БАҚ өкілдері мен мемлекеттің органдар арасындағы тиімді іс-қимыл, байланысты, ашықтықты қамтамасыз етіп келеді. Брифинг ұйымдастырудағы мақсаты есеп алу емес, жарты жыл, бір жыл ішінде атқарылған жұмыстардан хабардар болу. Журналист байланыса алмай жүрген басқарма, департамент басшыларын бетпе-жүз жүздестіре алатын бірден-бір орын.

Өңірлік коммуникациялар қызметі халық тарапынан келіп түскен арыз-шағым, сауалдарға да дер кезінде кері байланыс жасап отырады. Бұл тұста аудандағы медиа орталық басшыларының, баспасөз хатшыларының ықпалы зор, – деді А.Сәдуақас.

ҚР Журналистер одағының мүшесі, әдебиеттанушы Бақытжан Маханұлы өз сөзінде жалған ақпараттың қоғамға тигізер зияны мен медиасауаттылықтың маңыздылығына тоқталды. Спикер журналистер мен оқырмандар арасында сын тұрғысынан ойлау дағдыларын қалыптастыру қажет екенін, ақпаратпен жұмыс істеудің жауапкершілігі артқанын атап өтті.

Ал облыстық «Jambyl» телеарнасының директоры Гүлбаршын Құланбаева медиаконтентті визуализациялау әдістерімен бөлісіп, графика, инфографика мен бейнематериалдардың аудитория тартудағы маңызын нақты мысалдармен көрсетті. Сол секілді журналистің баяндау шеберлігі мен аудиториямен байланыс орнату тәсілдері айтылды. Спикер сендіру, эмоциялық әсер және тілдік стильдің рөліне ерекше мән берді.

Семинар барысында тек кәсіби дағдылар ғана емес, журналистердің әлеуметтік мәселелері де қозғалды. Қатысушылар саладағы еңбекақының төмендігі мен кадр тапшылығын ашық айтып, бұл мәселелердің БАҚ сапасына тікелей әсер ететінін жеткізді.

Ақтоты БЕКЕНҚЫЗЫ