Операция зақымданған бүйрек, бүйрек үсті безі және аймақтық лимфа түйіндерін толық алып тастауды қамтыды.

Аталған озық операция жаңа буынның роботтандырылған хирургиялық платформасы — Sage bot SR-2000көмегімен жасалды. Бұл платформа күрделі клиникалық жағдайларда да аз инвазивті араласу жүргізуге мүмкіндік береді. Бұған дейін қолданылған жартылай автоматтандырылған жүйелермен салыстырғанда, Sage bot SR-2000 хирургиялық дәлдікті, бейнелеу сапасын және операциялық процеске толық бақылауды айтарлықтай арттырды.

Роботтандырылған операцияның негізгі артықшылықтары:

Қатерлі ісіктің кең таралған түрлерін емдеуде тиімділіктің артуы;

Тіндерге минималды зақым келтіре отырып, қажетті араласу көлемін сақтау;

3D-визуализация арқылы операциялық өрісті дәл әрі анық көрсету;

Микрохирургиялық құралдардың жоғары маневрлік мүмкіндіктері;

Операциялық топтың физикалық жүктемесін азайту;

Пациенттерді қорғаудың интеллектуалды жүйелерін қолдану.

ҚазОРҒЗИ директоры Ербол Жасұланұлы Бекмұхамбетов бұл оқиғаны онкохирургия саласындағы маңызды жетістік ретінде бағалады:

«Біз озық технологияларды енгізу арқылы ең күрделі клиникалық жағдайларда да пациенттерге жоғары деңгейде көмек көрсетуге ұмтыламыз. Бұл — Қазақстандағы онкологиялық емдеудің жаңа кезеңінің бастамасы», — деді Ербол Бекмұхамбетов.

ҚазОРҒЗИ тәжірибесінде роботтандырылған хирургияның сәтті енгізілуі институттың технологиялық көшбасшылық ұстанымын және қазақстандық пациенттердің заманауи емдеу әдістеріне қолжетімділігін қамтамасыз етуге деген ұмтылысын тағы бір мәрте дәлелдеді.