Алғашқы болып баяндама жасаған облыс бойынша экономикалық тергеп-тексеру департаментінің қызметкері Жағыпар Исатаевтың айтуынша, соңғы 6 жылда департаментте Қылмыстық кодекстің 189 (жымқыру) және 190-баптары (алаяқтық) бойынша 92 қылмыстық іс тіркелген.

– Облысымызда ауылшаруашылығымен 138 мыңнан аса адам айналысады. Бұл басқа салалардың қызметкерлерінен бір жарым есеге көп. Қазақстан Республикасы Қаржылық мониторинг агенттігі құрылған сәттен бастап экономикалық тергеу қызметі бюджет қаражатын ұрлаудың ірі деректерін анықтауға жұмылдырылды. Мысал ретінде таңқурайдың элиталық сорттарын сатып алуға бөлінген субсидиялардың ұрлануын келтіргім келеді. Департамент жүргізген тексеріс нәтижесі бойынша шаруа қожалықтарының егістік алқаптарында ауылшаруашылығы дақылдарының субсидияланатын сорттары табылмаған. Осылайша, қылмыскерлер мемлекеттен заңсыз түрде 900 миллион теңгеден астам субсидия алған. Сонымен қатар «Ауыл шаруашылығы техникаларын, машиналарын және жабдықтарын алу» мемлекеттік бағдарламасы бойынша шаруа қожалықтары атынан алаяқтық арқылы заңсыз субсидия алған тұлғаларға 2023-2024 жылдары сот үкімдерді шығарды. Бүгінгі таңда алаяқтардың әрекетінен зардап шеккен шаруа қожалықтардың жалпы саны анықталды. Олардың саны 200-ден асады. Осы бағытта барлық қажетті тергеу амалдары жүргізілуде. Тергеліп жатқан істер аясында нақты ақшамен келтірілген шығынды өтеу ғана емес, қылмыстық жолмен алынған мүлікке тыйым салу қарастырылғанын да қоса кеткім келеді. Осы сәтті пайдалана отырып ауылшаруашылығы саласындағы барлық кәсіпкерлерге, шаруа қожалықтарының басшыларына электрондық цифрлық қолтаңбаны алаяқ болып шығуы мүмкін үшінші тұлғаларға беруге және пайдалануға жол бермеу туралы ескертеміз, – деді Жағыпар Қожахметұлы.

Сондай-ақ брифингте облыстық кәсіпкерлер палатасының сарапшысы Рүстембек Жаимбаев баяндама жасады.

Айжан ӨЗБЕКОВА