Жаңа үлгідегі мектепте 97 кабинет, 3 шеберхана, 6 зертхана, 4 компьютерлік сынып, хореографиялық залдар, коворкинг-орталықтар, үлкен асхана және 4 спортзалы қарастырылған. Сыныптарда интерактивті тақталар орнатылған. Білім ұясында 1310 оқушы оқиды.

2000 балаға арналған мектеп оқушылардың IT-құзыреттерін, ғылыми және шығармашылық әлеуетін қолдау үшін заманауи робототехника кабинеттерімен және STEM-зертханалармен жабдықталған, сонымен бірге бейнебақылау жүйелерімен қамтамасыз етілген.

Салтанатты шараға Жамбыл облысының әкімі Ербол Қарашөкеев, Тараз қаласының әкімі Бақытжан Орынбеков, білім саласының ардагерлері мен ұстаздар, сондай-ақ қала тұрғындары қатысты.

Ербол Шырақпайұлы алдымен көпшілікті қуанышымен құттықтап, ақжарма тілегін жеткізді.

– «Жайлы мектеп» ұлттық жобасы Мемлекет басшысы Қасым-Жомарт Тоқаевтың тапсырмасына сәйкес еліміздің барлық өңірінде жүзеге асырылуда. Бұл жоба білім беру саласының өзекті мәселелерінің бірі – оқушы орнының тапшылығын, үш ауысымды оқытуды және апатты жағдайдағы мектептердің мәселесін шешуге бағытталған. Сонымен қатар, оқу ордасы озық технологиялармен жабдықталып, оқушылардың қауіпсіз білім алуына барлық жағдай жасалған. Жылдан-жылға қарыштап дамып келе жатқан заманауи ғылыми жетістіктерге ілесу үшін сапалы білім алу маңызды. Сондықтан білім беру инфрақұрылымын ресурстық қамтамасыз ету – өңірдің дамуының негізгі бағыты болып қала береді, – деді облыс әкімі.

Шара барысында Ербол Шырақпайұлы мектеп оқушылары мен ұжымына арнайы сертификат табыстап, жаңа мектептің ашылуына зор үлес қосқан мердігер компания – «Отау-Строй» ЖШС өкілдеріне алғыс білдірді.

Келесі кезекте еңбек ардагері Нұрымбет Қарабаев ақ батасын беріп, облыс әкімімен бірге оқу ордасының лентасын қиды.

Бұл білім ұясы заманауи құрал-жабдықтармен толыққан. Мектепте оқу кабинеттері, зертхана, шеберхана, кітапхана, робототехника және медициналық кабинеттер бар. Жаңа мектеп оқушылардың сапалы білім алуы үшін барлық қажетті жағдаймен қамтамасыз етілген.

Еске сала кетейік, бұл Тараз қаласында «Жайлы мектеп» ұлттық жобасы аясында ашылған үшінші оқу орны. Бұған дейін «Бәйтерек» (13) және «Ұлы дала» (15) шағын аудандарында 1200 орындық мектептер ашылған болатын. Сондай-ақ, «Шөлдала» алқабында 600 орындық мектептің құрылысы жалғасуда.