Ыстық ықыласы жамандық атаулыдан сақтап, алақаны мейірімнің ұясына айналған әжелердің ұрпақ тәрбиесіндегі орны бөлек.  «Бір қолымен әлемді екінші қолымен бесікті тербеткен» ақ жаулықты аналар қай кезде де ұлттық құндылықтарды ұлықтап, дәстүр-салтымызды дәріптеп келеді. Әулеттің ғана емес, тұтастай ұлттың алтын діңгегіне айналып отырған ғазиз жандарға жүктелген жауапкершілік те жоғары. Сондықтан да  аталған сайысқа қатысушыларға қойылатын талап та, артылатын сенім де жеңіл болған жоқ.

Үміткерлер әуелі  «Асыл әжем, ақ әжем, ақ жаулықты дана әжем» атты таныстыру кезеңі бойынша бақ сынады. Ал «Әженің ақыл қоржыны» атты кезеңде қатысушылар қазақтың жөн-жоралғысын, салт-дәстүрлерін, әдет-ғұрпын дәріптеді.

«Ата мұра – асыл қазына» деп аталатын үшінші кезеңде әжелер кестелі орамал, құрақ көрпелер сынды сан алуан қолөнер бұйымдарын көптің назарына ұсынды. Төртінші «Әжеммен өмір ажарлы» айдарында сынға түскен үміткерлер өздері бағып-қаққан немерелерімен бірге ортаға шығып, өнерлерін паш етті.

Байқау барысында әжелер тек қана ән мен жырдан шашу шашып қана қойған жоқ, қолөнерімен де бірінен-бірі асып түсті. Сондай-ақ, қазіргі қоғамдағы өзекті мәселелер жөнінде келелі кеңес айтып, пікір білдірді.

Ал педагогика ғылымдарының докторы, Тараз қалалық ардагерлер кеңесі жанындағы Аналар алқасының төрайымы Жанат Сарыбекова бастаған қазылар алқасы жеке орын белгілемей, оның орнына әрқайсысының көрсеткен өз өнеріне сәйкес лайықты аталым  беруді жөн деп шешті.

Атап айтқанда Ардақ Рысбаева «Сүйкімді әже» атанып, көрермен көзайымына айналды. «Парасатты әже» аталымы Ұлбосын Палжероваға бұйырса, Айзада Іргебаева «Мейрімді әже», Галина Қойшыбаева «Өнерлі әже» Дариға Бижанова «Инабатты әже» аталымына ие болды.

Балдан тәтті немересін бағып отырған әз әжелердің байқауын қорытындылаған Тараз қалалық ардагерлер кеңесінің төрағасы Күләш Әбдікешова ыстық ықыласын білдіріп, ақ тілегін арнады. Аяулы әжелердің ұрпақтарының қызығына кенеліп, жүздерінен шуақ шашып жүре берулеріне тілестестігін білдірді. Саусағынан бал тамған өнерлі әжелерге Тараз қаласының әкімі Бақытжан Орынбековтың Алғыс хаттарын табыстап, қалы кілемдер тарту етті.

Әлия ЖАНӘБІЛ,

М.Х.Дулати атындағы Тараз универститетінің 4-курс студенті