Биылғы тізімге Қазақстаннан жеті кәсіпкер кірді. Олар – Вячеслав Ким, Михаил Ломтадзе, Тимур Турлов, Владимир Ким, Тимур және Динара Құлыбаевтар, сондай-ақ Булат Өтемұратов.

2025 жылы ең бай қазақстандық ретінде Вячеслав Ким танылды. Kaspi.kz акционері және директорлар кеңесінің төрағасының байлығы $7,1 млрд деп бағаланды. Ол жаһандық рейтингте 464-орынға көтерілді (былтыр 511-орында болған).

Кимнің серіктесі, Kaspi.kz-тің тағы бір акционері Михаил Ломтадзе қазақстандық миллиардерлер арасында екінші орынға жайғасты. Оның байлығы $5,9 млрд болып, Forbes тізімінде 597-орынды иеленді (өткен жылы 581-орында болған).

Биыл Freedom Holding негізін қалаушы Тимур Турлов қазақстандық миллиардерлер арасында үшінші орынға көтерілді. Оның байлығы $3,3 млрд-тан $5,8 млрд-қа дейін өсті. Ол жаһандық рейтингте 605-орынға шықты (былтыр 991-орында болған).

Төртінші орында – KAZ Minerals және Казахмыс акционері Владимир Ким. Оның байлығы $5,7 млрд-қа жетіп, Forbes тізімінде 620-орынға көтерілді (өткен жылы 896-орында тұрған).

Тимур және Динара Құлыбаевтар рейтингте бесінші және алтыншы орындарды иеленді. Олардың әрқайсысының дәулеті $5,3 млрд деп бағаланды. Олар жаһандық тізімде 673-орында (былтыр 612-орында болған).

ForteBank акционері Булат Өтемұратов биыл қазақстандықтар арасында жетінші орынға шықты. Оның байлығы $3,7 млрд-қа жетіп, Forbes тізімінде 979-орынға орналасты (былтыр 1238-орында тұрған).

Ал әлемдік рейтингтің көшін Tesla және SpaceX негізін қалаушы Илон Маск бастады. Оның байлығы $342 млрд-қа жетіп, бір жыл ішінде $147 млрд-қа артқан.

Meta (Facebook) компаниясының негізін қалаушы Марк Цукерберг рейтингте екінші орынға көтерілді. Оның дәулеті $216 млрд деп бағаланды.

Amazon негізін қалаушы Джефф Безос үшінші орынға жайғасты. Оның байлығы $215 млрд-қа жетті.

Өткен жылы тізімнің көшін бастаған Louis Vuitton Moët Hennessy басшысы Бернар Арно бесінші орынға төмендеді. Оның байлығы $178 млрд-ты құрап, бір жылда $55 млрд-қа азайған.

Айта кетейік, әлемдегі 20 ең бай адамның жалпы байлығы – $2,8 трлн.