Ұлттық поэзиямыздың ақ бесігінде тербеліп, жырмен сырласқан, қаламымен қазақтың жүрегіне жол тапқан біртуар ақын, Қазақстанның Халық жазушысы, Қазақ ССР Мемлекеттік сыйлығының лауреаты Тұманбай Молдағалиевтің туғанына биыл 90 жыл. Оның мөлдір лирикасы, махаббатқа, туған жерге деген шексіз сүйіспеншілікке толы жырлары бірнеше буынның жүрегінен орын тапты.
Осы атаулы мерейтой аясында Тараз қаласындағы Қазақстан Республикасы Ұлттық ұланы 5513 әскери бөлімі мен Шерхан Мұртаза атындағы Руханият және тарихтану орталығы бірлесіп, «Ақынның жауһар жырлары» атты әдеби-сазды кеш ұйымдастырды. Бұл шара ақын мұрасын жастар арасында кеңінен насихаттауды, оның жүрекке жылы тиер жырлары арқылы сарбаздардың рухын көтеруді мақсат етті.
Әдеби-сазды кеш ақынның «Бақыт құшағында» өлеңімен шымылдығын ашты. Жас сарбаздар мен болашақ ұстаз студенттер Тұманбай ақынның сыршыл жырларын жатқа оқып, жүрекке жететін әндерін жанды дауыста орындады. Оның әнге айналған өлеңдері – ұлттық музыка қазынасының баға жетпес жауһарлары. Ақын қаламынан туған 500-ге жуық ән мәтіні қазақ эстрадасының көркемдік деңгейін биікке көтергені сөзсіз.
Кеш барысында ақынның өмірі мен шығармашылығы жайлы тың деректер айтылып, оның әдебиетке қосқан үлесі кеңінен баяндалды. Шараға қатысқан жастар ақын өлеңдеріндегі шынайылық пен сезім тереңдігін ерекше тебіреніспен жеткізді.
Тұманбай Молдағалиев – қазақ поэзиясында лирикалық өлеңдердің шебері. Оның өлеңдерінде туған жерге деген сағыныш, адамгершілік, адалдық, достық пен махаббат тақырыптары кеңінен көрініс тапқан. Оның әр жыры оқырманын ойландырып, жүректерге сәуле құяды.
Ақын жырларында ерекше бір жылылық бар. Ол поэзиясын биік мұратқа, шынайы сезімге негіздеп, оқырманына жақындата білді. Оның өлеңдері бүгінгі жастарға да өзекті, себебі олар тек өткеннің емес, бүгіннің де үнін жеткізеді.
Әдеби-сазды кештің қорытынды бөлігінде әскерде борышын өтеп жүрген сарбаздар «Жан досым» әнін орындап, іс-шараны ерекше рухты көңіл күймен аяқтады. Бұл ән – достықтың, бірліктің, сарбаздық өмірдің риясыз бейнесі.
Кешке қатысушылар Тұманбай ақынның мұрасы өшпейтінін, оның жырлары болашақ ұрпақ үшін де рухани азық болатынын атап өтті. Осындай шаралар ақынның шығармашылығын жастарға таныстырып қана қоймай, ұлттық әдебиетке деген құрметті де қалыптастырады.
Тұманбай ақын жырлаған мәңгілік тақырыптар өміршең. Оның өлеңдері әлі талай ұрпақтың жүрегін тербеп, жыр әлемінің биігіне жетелей беретіні сөзсіз.
Алдыңғы мақала
Ұқсас жаңалықтар
