Жиын барысында аймақ басшысы облыстық Қазақстан халқы Ассамблеясының ел бірлігін нығайтуға, елдік мұраттарды жүзеге асыруға қосқан үлесін жоғары бағалап, бұл бағыттағы жұмыстардың маңыздылығын атап өтті.

– Құрметті облыстық Қазақстан халқы Ассамблеясының өкілдері! Еліміздің ішкі тұрақтылығы мен сіздердің атқарып отырған жұмыстарыңыз аз емес. Бүгін біз мемлекеттік тілде білім беруді қолдау және көпұлтты ортада патриоттық тәрбиені нығайту бойынша өзекті мәселені қарастыратын боламыз. Бұл мәселе білім беру саласында ғана емес, ұлттық бірегейлігімізді сақтау және дамыту, патриоттық сезімді нығайту тұрғысында да өте маңызды. Жуырда өткен Ұлттық құрылтайдың төртінші отырысында Мемлекет басшысы Қасым-Жомарт Тоқаев озық ойлы ұрпақ өсіру үшін білім мен тәрбие әрдайым қатар жүруі керектігін атап өтті. «Тәрбиесіз берілген білім – адамзаттың қас жауы. Сондықтан біліммен қатар тәрбиеге айрықша назар аудару өте маңызды», деген болатын. Осыған байланысты патриоттық тәрбие – тек өз елін сүю ғана емес, басқа ұлттардың мәдениетіне құрметпен қарау, өзара түсіністік пен достық орнату деген сөз, – деді Ербол Шырақпайұлы.

Жиын барысында облыс әкімдігі мәдениет және тілдерді дамыту басқармасының басшысы Ерлан Жүнісбай мен Қордай ауданы әкімінің орынбасары Жұлдызбек Бақаев мемлекеттік тілде білім беруді қолдау бойынша баяндама жасап, осы бағытта атқарылып жатқан жұмыстарға тоқталды.

Сондай-ақ, облыстық ҚХА жанындағы ғылыми-сараптамалық топтың төрағасы Махметқали Сарыбеков патриоттық тәрбиенің қазіргі форматтарын қайта қарастыру қажеттігіне тоқталып, жастардың қызығушылығына сай жаңа тәсілдерді енгізу туралы ұсыныс білдірді. Ол патриоттық тәрбие беру ісінде сапа мен нәтижеге баса назар аудару керектігін атап өтіп, қазіргі таңда «Біртұтас тәрбие» бағдарламасы жүзеге асырылып жатқанын, осы негізде ұлттық жоба мен концепция қабылдау маңызды екенін жеткізді.

Басқосуда сөз алған облыстық ұйғыр этно-мәдени бірлестігінің төрайымы Мухабат Турдыева және облыстық ҚХА Ақсақалдар кеңесінің төрағасы Асқарбек Сейілхан жастарды патриоттық рухта тәрбиелеу, өзге ұлт өкілдерінің балаларын осы бағыттағы жұмыстарға тарту мәселелері бойынша ойларымен бөлісті. Олар этностық алуандылықты ескере отырып, патриотизмді дамыту тетіктерін күшейту керектігін айтып, бірлескен жобалар мен іс-шаралардың маңыздылығына назар аударды.

Кездесу барысында мемлекеттік тілдің дамуына қолдау көрсету, патриоттық тәрбиенің сапасын арттыру және ұлтаралық татулықты нығайту жолдары жан-жақты талқыланды.

Облыс әкімі Ербол Қарашөкеев ҚХА өкілдеріне ел бірлігін сақтаудағы еңбектері үшін алғыс айтып, бұл бағыттағы жұмыстарды жүйелі түрде жалғастыру қажеттігін атап өтті.

Айжан ӨЗБЕКОВА