Тараз жастар театрының тұсауы Ы.Дүкенұлы атындағы қалалық мәдениет үйінде Халықаралық театр күні қарсаңында кесілді. Мереке барысында фойеде фольклорлық ансамбль күмбірлете күй тартып, кештің ажарын аша түссе, екінші фойеде кітап көрмесі және фотозона орналастырылады.

Салтанатты жиынды облыс әкімі Ербол Қарашөкеев құттықтау сөзбен ашып, театры ұжымына сәттілік тіледі.

– Мемлекет басшысы Қасым-Жомарт Тоқаев Ұлттық құрылтайдың төртінші отырысында: «Қазақстанда театр өнеріне қызығушылық артып келеді. Зал көрерменге толы, қойылымдардың премьерасына билеттер екі-үш апта бұрын сатылып кетеді. Сахна өнеріне құштар жандардың арасында жастардың көп болуы көңілге ерекше қуаныш ұялатады. Сондықтан аймақтарда театрларды салуға және дамытуға баса назар аудару керек» деп нақты тапсырмалар жүктеген болатын. Бұл бағытта өңірімізде ілкімді істер атқарылуда. Тәуелсіздік жылдары көптеген мәдени нысандар бой көтеріп, ел игілігіне берілді. Бүгін ашылып отырған қалалық жастар театры да – сол істің жалғасы. Киелі Әулиеата жерінде өнер биігін бағындырған қайраткерлер аз емес. Сол майталмандардың ізін жалғайтын жандарға осы студия серпін беріп, шығармашылықтың шыңына шығарады деген ойдамын, – деген Ербол Шырақпайұлы кәсіби мерекеге орай облысымыздың бірқатар театр майталманын марапаттады.

Мұнан соң ҚР Еңбек сіңірген әртісі, М.Х.Дулати атындағы Тараз университетінің профессоры Асқарбек Сейлхан сөз алып, жас театрға тілегін білдіріп, ағалық батасын берді.

– Біз бұл қуанышты сәтті ұзақ күттік. Бірнеше жылдан бері «жастар театры ашылса екен» деп жанымызды жалдап, талай жердің есігін қағып едік. «Бітер істің басына, жақсы келер қасына» демекші облыс әкімінің бастамасымен бүгін көңіл толқытар сәтке куә болып отырмыз. Күні кеше ғана өткен құрылтайда Мемлекет басшысының өзі осы тақырыпты қозғап, «театрға назар аудардыңыздар» деген болатын. Президент тапсырмасына сай көзді ашып-жұмғанша жастар театры ашылды. Қуантатыны, облыс әкімі мәдениет, өнер саласына айрықша қолдау көрсетіп отыр. Белгілі режиссер Асқар Тоқпановтың 130 жылдығын, осы тұлғаның есімімен аталатын облыстық қазақ драма театрының 90 жылдығын лайықты деңгейде атап өтілсе деп өтінішімізді жеткізген едік. Ұсынысымыз жерде қалмай, алда халықаралық өнер фестивалі ұйымдастырылатын болды. Жастар театрының болашағы жарқын, ғұмыры ұзақ болсын. Ата театрдың бала театрға берген батасы осы болсын, – деді А.Сейілхан.

Осыдан кейін жиналған жұрт Тараз жастар театрының дебюттық «Уақыттан биік әуен» атты қойылымын тамашалады. Әсем әнмен, жарасымды бимен өрілген спектакльде жас актерлер қазақ вальсінің королі Шәмші Қалдаяқовтың өмірін шеберлікпен суреттеп, залды бір серпілтіп тастады.

– Ә дегенде осы қойылымды назарға ұсынуымыз бекер емес. Негізі өзіміз Шәмші Қалдаяқовтың 95 жылдығына орай әдемі бір композиция құрсақ деп дайындалып жүргенбіз. Қойылым жастар театрының ашылуына бұйырып тұр екен. Қалалық мәдениет үйінің құрамындағы театрда 12 өнерлі ұл-қыз, бір хореограф, бір режиссер бар. Режиссерымыз – ҚР Мәдениет қайраткері, М.Х.Дулати атындағы Тараз университетінің оқытушысы Шолпан Айтибаева. Бір айта кетерлігі, театрдың әлі жетекшісі, арнайы режиссері жоқ. Ол мәселе мамыр айында шешімін табады. Ол уақытқа дейін жастарға өзім бағыт-бағдар беремін, – дейді ҚР Мәдениет қайраткері Айгүл Қабиева.

Жалпы облыста үлкенді-кішілі оқу орындарын бітірген әртістер шетке кетіп жататыны рас. Жас таланттардың өңірде қалуына осы театрдың ашылуы басты себеп болып тұр.

Салтанатты кеш соңында Тараз қалалық жастар театры ұжымына облыс әкімінің ықылас гүлі тарту етілді.

Ақтоты ЖАҢАБАЙ