Наурызнама аясында өңірде түрлі іс-шаралар ұйымдастырылып, халықтың белсенділігі арта түсті. Жамбылдықтар жылдағы дәстүр бойынша үлкендерге сәлем беріп, батасын алды. Қаланың басты көшелері мен саябақтарында ұлттық тағамдар әзірленіп, көпшілікке таратылды. Ауылдық жерлерде киіз үйлер тігіліп, алтыбақан құрылды.

Экологиялық тазалық акциялары да назардан тыс қалмады. Қала мен аудандарда сенбіліктер ұйымдастырылып, ағаш отырғызу шаралары өтті. Спорттық жарыстар, ұлттық ойындар сайысы да мерекенің көркін қыздырды.

Мереке аясында әлеуметтік қолдауды қажет ететін жандарға көмек көрсетілді. Көпбалалы және аз қамтылған отбасыларға азық-түлік себеттері таратылып, қайырымдылық акциялары ұйымдастырылды. Жастар волонтерлік қызметке белсене араласып, ардагерлер мен мүмкіндігі шектеулі жандарға қолдау көрсетті.

Береке мен бірлікті паш ететін мерекелік іс-шаралар Тараз қаласында ғана емес, барлық аудан-ауылдарда кең көлемде ұйымдастырылды.

Ұлыстың ұлы күні орталық алаңға жиналған қала тұрғындары мен қонақтары «Құс қанатындағы Наурыз» атты театрландырылған қойылымды тамашалап, ұлттық дәстүр мен құндылықтарға қанықты. Көрермендер назарына халқымыздың бай мұрасын дәріптейтін, қазақы болмысты айшықтайтын мәдени бағдарламалар ұсынылды. Сондай-ақ елімізге және өңірге белгілі өнерпаздар әсем әндерімен, мың бұралған билерімен және күмбірлеген күйлерімен мерекелік шараның көркін аша түсті.

Мереке аясында Қайрат Рысқұлбеков саябағына дейін ақшаңқан киіз үйлер тігіліп, алтыбақан орнатылды. Ұлттық тағамдар әзірленіп, тұрғындар наурыз көжеден дәм татты. Сонымен қатар қазақтың дәстүрлі спорт ойындарынан бәсекелер ұйымдастырылып, сайысқа қатысушылар өздерінің шеберліктері мен ептіліктерін көрсетті. Көрермендер асық ату, күрес, тоғызқұмалақ сияқты ұлттық спорт түрлерін қызықтап, жекпе-жектерге қолдау білдірді.

Салтанатты жиын ән мен күйге ұласып, көрермендерге ерекше әсер сыйлады. Мерекеге жергілікті өнерпаздармен қатар «Жігіттер» квартеті, «Қоңыр» тобы, Қырғызстанның ел әртісі Саламат Садықова және Гүлнұр Оразымбетова сынды өнерпаздар қатысып, музыкалық тарту жасады. Кештің көркін жандандырған бұл концерттік бағдарлама жиналған жұртқа ұмытылмас әсер сыйлады.

Орталық алаңда 12 киіз үй тігіліп, қонақтарға дәстүрлі ойын-сауықтар ұсынылды. Киіз үйлерде халқымыздың тұрмыс-тіршілігінен сыр шертетін қолөнер бұйымдары, ұлттық нақыштағы киімдер мен тарихи жәдігерлер қойылды.

Тараз төріндегі әз Наурыз халқымыздың бірлігі мен берекесін айшықтай түскен мәдени іс-шаралардың бірі болды. Сондай-ақ қазақ мәдениетінің озық үлгісін дәріптеген бұл мереке елдің рухын көтеріп, ұлттық сана-сезімді нығайтуға үлес қосты.

Наурыз думанына облыс әкімі Ербол Қарашөкеев арнайы қатысып, зиялы қауым өкілдерімен, ардагерлермен бірге алаңдағы шараларды аралап көрді. Ол жамбылдықтарды көктемнің ұлы мейрамымен құттықтап, Наурыз мерекесінің бірлік пен татулықтың, жаңару мен жаңғырудың бастауы екенін атап өтті.

– Баршаңызды Ұлыстың ұлы күні – Наурыз мерекесімен шын жүректен құттықтаймын! Биылғы әз Наурыз қасиетті Рамазан айымен тұспа-тұс келіп отыр. Бұл – жақсылықтың, татулықтың, жаңарудың белгісі. Мемлекет басшысы Қасым-Жомарт Тоқаевтың бастамасымен өткен жылдан бері Наурыз мейрамын тойлаудың жаңа тұжырымдамасы енгізілді. Осы орайда «Наурызнама» онкүндігі биыл да жалғасын тауып, халқымыздың ұлттық дәстүрін ұлықтау мақсатында түрлі шаралар өтуде. Баршаңызды туған жеріміздің гүлденуі жолында бірлесе еңбек етуге шақырамын. Ұлыс оң, ақ мол болсын! – деді облыс әкімі.

Айта кетейік, әз Наурыз мерекесіне арналған іс-шаралар облыстың барлық аудандары мен ауылдық елді мекендерінде де кеңінен аталып өтті. Ұлттық салт-дәстүрімізді дәріптеу, қазақы құндылықтарды ұрпақ санасына сіңіру мақсатында ұйымдастырылған мерекелік іс-шаралар халыққа ерекше рухани серпіліс сыйлады.

Облыс әкімінің баспасөз қызметі