– Мемлекет басшысының тапсырмасына сәйкес 2024 жылы «Таза Қазақстан» республикалық экологиялық акциясы бастау алды. Экологиялық акция шеңберінде облысымызда «Таза өлке», «Киелі мекен», «Жасыл аймақ», «Өнегелі ұрпақ», «Мөлдір бұлақ» акциялары өткізіліп, 60 тарихи-мәдени ескерткіш пен 143 саябақ, сквер аумағы, 829 шақырым канал мен арық жүйесі, 137,5 мың аулалар мен 4,8 мың шақырым көше жолдары тазартылды. 30 875 тонна қоқыс шығарылып, 60 мыңға жуық көшет отырғызылды. Жалпы тазалық жұмыстарына 1 110 техника жұмылдырылды, – дейді Қанатбек Қайшыбекұлы.

Облыс әкімі орынбасарының айтуынша, өңіріміздегі 371 елді мекенде 163 тұрмыстық қатты қалдықтар полигоны орналасқан. Оның 159-ы коммуналдық меншікте, төртеуі жеке кәсіпкерлерге сенімгерлік басқаруға берілген. Сонымен қатар экология департаменті тарапынан кездейсоқ тұрмыстық қатты қалдықтардың орнын анықтау мақсатында «Қазақстан Ғарыш Сапары» Ұлттық компаниясы» акционерлік қоғамының бағдарламасы арқылы ғарыштық мониторинг түсірілімі жүргізіліп, нәтижесінде 343 кездейсоқ қоқыс учаскелері анықталып, толық жойылған.

Сондай-ақ Тараз қаласы аумағындағы талдарды цифрландыру жұмыстары да қарқынды түрде жүзеге асуда. Цифрландыру ағаштарды бақылауға мүмкіндік береді. Яғни қураған немесе ауруға шалдыққан, кеміргіш жәндіктер басып кеткен ағаштар осы бағдарлама арқылы көрініп отырады. Аталған арнайы жүйе арқылы әрбір ағаштың өсу мерзімі, өсуге жарамсыз ағаштың босаған орны анықталады. Сол мезетте жауапты мамандар жүйеден көру арқылы тиісті шешімдерді қабылдайды екен. Бұл цифрлық бағдарламада ағаштардың саны, түрлері, олардың өмір сүру ұзақтығы толық сақталады.

Мұқағали БАЛТАБАЕВ