Қазақстан Республикасы Оқу-ағарту министрлігінің бастамасымен Наурыз мейрамы қарсаңында «Күй күмбірі» атты республикалық челлендж өткізілді.

Бұл ауқымды шараға еліміздің түкпір-түкпірінен 1 миллионға жуық бала қатысты. Олар бір мезетте «Балбырауын», «Адай», «Сарыарқа», «Тепең көк», «Әлқисса», «Ерке сылқым» және басқа да халыққа танымал күйлерді орындады.

Музыкаға және ұлттық салт-дәстүрге деген сүйіспеншілік мектеп оқушыларын ғана емес, балабақша тәрбиеленушілерін, колледж студенттерін де біріктірді. Челлендждің ең жас қатысушысы – Қостанай облысы, Қарабалық ауылындағы «Айналайын» балабақшасының 4 жасар тәрбиеленушісі Жұмабек Самир.

Алматы қаласының Бостандық ауданында 1000-нан астам оқушы атақты күйлерді ашық аспан астында орындап, ерекше атмосфера қалыптастырды. Сонымен қатар, Павлодар, Түркістан және Шығыс Қазақстан облыстарында оқушылар қобыз, дауылпаз сияқты ұлттық аспаптарда танымал композициялар ойнады.

«Күй күмбірі» челленджінің басты мақсаты – жас ұрпақтың бойында рухани-адамгершілік қасиеттерді қалыптастыру, патриотизмге тәрбиелеу, елдің мәдени мұрасын сақтау және балалар арасында домбыра аспабын насихаттау.