Шараның басты мақсаты – экологиялық ахуалды жақсарту, өңір табиғатын көгалдандыру және тұрғындарды қоршаған ортаны аялауға шақыру.

Акцияға аудан әкімінің орынбасары Жанғозы Жаркенов, «Қазақсода» ЖШС-нің өндіріс саласы бойынша директоры Фаттах Ақсу, Сарысу ауданы әкімдігінің ішкі саясат бөлімінің басшысы Ұлбике Сәлімова және «Қазақсода» ЖШС қызметкерлері белсене қатысты.

Аудан әкімінің орынбасары Жанғозы Жаркенов қатысушыларға құттықтау сөз сөйлеп, табиғатты аялаудың маңызына тоқталды. Ол жиналғандарды Ұлыстың ұлы күнімен құттықтап, елімізге амандық тіледі. Сондай-ақ, «Қазақсода» ЖШС-нің өндіріс саласының директоры Фаттах Ақсу аталмыш шараның мән-маңызын айта отырып, компанияның экологиялық бастамаларға ерекше көңіл бөлетінін жеткізді.

Қатысушылар жоғары белсенділік танытып, бірігіп тал екті. Бұл – табиғатты қорғау, оны келер ұрпаққа таза әрі жасыл күйінде аманат ету жолындағы игі бастама. Тал егу шарасы алдағы уақытта да өз жалғасын табатын болады.