Президент Қасым-Жомарт Тоқаев ұлттық бірегейлікті нығайтуда мәдениеттің ерекше рөл атқаратынын атап өтті. Ол әсіресе, Әз-Наурыз мейрамының маңыздылығын ерекше белгіледі. Жаңа тұжырымдамаға сәйкес, Ұлыстың ұлы күні 14 наурыз – Амал күнінен басталып, он күн бойы тойланатын болды. Әр күнге арнайы атау беріліп, бұл бастама халық тарапынан жылы қабылданды.

Әсіресе, "Ұлттық киім күні" көпшіліктің қолдауына ие болып, ұлттық киімдерге деген қызығушылық арта түсті. Президент мектептерде, мекемелерде және ірі компанияларда ұлттық киім кию дәстүрге айналып келе жатқанын атап өтті. Осы сұранысқа байланысты жаңа тігін цехтары, отандық брендтер мен дүкендер ашылып, ұлттық киім кию күнделікті өмірдің бір бөлігіне айналуда.

"Бұл – өте жақсы үрдіс. Бет-жүзді тұмшалайтын қара киімдерден гөрі, ұлттық киіміміз әлдеқайда көрікті. Әсіресе, әйелдердің дәстүрлі киімі – халқымыздың мәдени мұрасының ажырамас бөлігі. Ұлттық киімді насихаттап, оны заманауи өмірге бейімдеуіміз қажет," – деді Тоқаев.