Ахондроплазия (ергежейлілік) – туа біткен ауру. Қаңқа сүйектері мен бас сүйегінің өсу процесі бұзылған жағдайда пайда болады. Негізінде дүниеге келген сәбиде ауру белгілері алғашқы күндерден-ақ анық байқалады. Себебі нәрестенің басының көлемі үлкен, аяқ-қолдары қысқа, омыртқа сүйектері қисық, маңдайы шығыңқы болады. Кейіннен дене бітімінде де өзгерістер байқалады. Яғни, өзге адамдармен салыстырғанда бойы тым аласа болады. Сондай-ақ өз жасынан кеш дамып, 2-3 жасқа дейін жүре алмауы да мүмкін. Мамандардың айтуынша, бұл ауру – 80 пайыз жағдайда тұқым қуаламайды. Ал қалған 20 пайыз мұрагерлік болуы мүмкін. Сондықтан да әулетіңізде осы аурумен ауыратын адам болса, жүктілік кезінде генетикалық тестілеуден өткеніңіз абзал. Ахондроплазия ауруына нақты ем-дом жоқ. Бар болғаны, антибиотиктер тағайындап, жұлын стенозының ауыр жағдайларында хирургиялық араласу жасалуы мүмкін. «Демі бардың – емі бар» демекші, бойыңызға біткен аурудан бірден сауығып кетпесеңіз де, дерттің алдын алып, күтіну арқылы ауруға қарсы тұруға болады. Дәрігерлер барлық күш-жігерін салса да, сіз жақтан талпыныс болмаса, жасалған ем-домның пайдасы болмайды. Сондықтан да ауырып ем іздегенше, ауырмайтын жол іздеңіз.

Облыс әкімдігі денсаулық сақтау басқармасының баспасөз қызметі