Байқаудың облыстық кезеңіне Тараз қаласы мен аудандардан үздік деп танылған 28 бастауыш партия ұйымы қатысты. Қатысушылар 3 санат бойынша, яғни құрамында 100-ге дейін мүшесі бар бастауыш партия ұйымдары бірінші санат, 100-ден 500-ге дейінгі мүшесі бар ұйымдар екінші санат және 500 немесе одан да көп мүшесі бар бастауыш партия ұйымдары үшінші санат бойынша сынға түсті.

Арнайы құрылған комиссия мүшелері ұйымдардың жұмыс тәжірибесін тарату, озық тәжірибені анықтау және ауқымын кеңейту, қоғамда партияның іс жүзіндегі жұмысы туралы объективті пікір қалыптастыру, партия қатарын нығайту жұмыстарына баса назар аударды.

Байқауға қатысқан бастауыш партия ұйымдары осы уақытқа дейін жеткен жетістіктері мен атқарып жатқан жұмыстарының нәтижелері туралы баяндама жасады. Әр ұйымға 5 минут уақыт беріліп, баяндама соңында комиссия мүшелерінің сұрақтарына жауап берді.

– «AMANAT» партиясының облыстық филиалы ұйымдастырған барлық іс-шараларға біздің ұйым мүшелері тұрақты қатысып, белсенділік танытуда. Сонымен қатар «Салауат» бастауыш партия ұйымы қайырымдылық шараларынан да қалыс қалған емес. Мәселен жыл сайын облыстық қан орталығындағы әлеуметтік аз қамтылған отбасы қызметкерлеріне гуманитарлық көмек көрсетіледі. 2024 жылы қызметкерлерге 25 келі ұн, 25 келі шекер, 25 келі пияз үлестірілді. Сондай-ақ Ақтау қаласындағы су тасқынынан зардап шеккен тұрғындарға қол ұшын создық. Партия жұмысын жетілдіру мақсатында бірнеше жобаны іске асыруды көздеп отырмыз. Атап өтсек, партия қатарына белсенді азаматтарды тарту, қоғамдық қабылдауды жүйелі түрде ұйымдастыру, ел тәуелсіздігін, халық бірлігін нығайтуға бағытталған іс-шараларды өткізу жоспарымызда бар, – дейді Тараз қаласындағы «Салауат» бастауыш партия ұйымының төрағасы Әсел Мырзалықызы.

Байқау қорытындысы бойынша 1-санат бойынша І орынды «Салауат» бастауыш партия ұйымы жеңіп алды. ІІ орын Байзақ аудандық «Кеңес» бастауыш партия ұйымына бұйырды, ІІІ орынды Талас аудандық «Кітапхана» бастауыш партия ұйымы қанжығасына байлады. Ал 2-санат бойынша І орынды Байзақ аудандық «Бурыл» бастауыш партия ұйымы еншіледі. Меркі аудандық «Сұрат» бастауыш партия ұйымы мен Жуалы аудандық «Жуалы-Газ» бастауыш партия ұйымы және Тараз қалалық «Алау» бастауыш партия ұйымы жүлделі ІІ, ІІІ орындарды өзара бөлісті.

Сондай-ақ 3-санат бойынша Жамбыл аудандық «Жетітөбе» бастауыш партия ұйымы І жеңімпаз атанды. Меркі аудандық «Меркі» бастауыш партия ұйымы ІІ орын тұғырынан көрінді. Ал Тараз қалалық «Арайстроймаркет – 2003» бастауыш партия ұйымы ІІІ орынды қанағат тұтты.

Үздік деп танылған бастауыш партия ұйымдары бағалы сыйлықтармен марапатталып, республикалық кезеңге жолдама алады.

Мұқағали БАЛТАБАЕВ