Жаңа нысанның ашылу салтанатына келген ауыл тұрғындарының қарасы көп болды. Аллея шекара бекетінің жанында орналасқандықтан ауылымызға ерекше көрік беретіні сөзсіз. Себебі алыстан көрініп тұрған жасанды пальма ағаштары өзіне еріксіз назар аударады. Аллеяның айналасы сәнделіп, маңайына қиыршық тас төселіп, толықтай жарықтандырылған. Сонымен қатар серуендеушілер демалатын арнайы орындықтар қойылған. 40-қа жуық шырша және 30 шақты катальпа сәндік ағаш көшеті отырғызылыпты. Одан бөлек айналасын көгалдандыру жұмыстары да назардан тыс қалмаған. Кішкентай балақайларға арналып ойын алаңшасы да салынған.

Ашылу салтанатына қатысқан аудан әкімі Бегзат Сейсенқұлұлы қордайлықтарды жаңа аллеяның ашылуымен құттықтады.

– Құрметті жерлестер! «Таза Қазақстан» экологиялық акциясының «Жасыл аймақ» апталығында осы маңайды тазартқанымызда жергілікті тұрғындардан суайдын аумағын демалыс орнына айналдыру жөнінде ұсыныс түскен болатын. Міне, бүгін ауыл тұрғындарының тілегі ескеріліп, Қордай ауылында ерекше мәні бар жаңа аллеяның ашылу рәсіміне жиналып отырмыз. Бұл аллея – өте маңызды әлеуметтік, тіпті саяси жоба. Оның түпкі мәні – көршілес қырғыз елі арқылы өтетін жолаушылар мен туристер үшін тек ауданның емес, қуатты Қазақстанның әсем бейнесін көрсету болып табылады. Сондықтан өскелең ұрпақты қоршаған ортаны таза ұстауға баулып, туған жердің табиғатын аялауға үйретейік. Жаңа демалыс орны сіздерге қуаныш пен жайлылық сыйласын! – деп атап өтті аудан әкімі.

Аллеяның лентасын қию рәсімі Қордай ауданының Құрметті азаматтары Құрманғали Уәли мен Төле Сүгірбайға ұсынылды. Дәстүр бойынша шашу шашылып, кейін іс-шараға келгендер аудандық өнер мектебінің суретшілері дайындаған көрмені тамашалап, жас шахматшылардың ойынын көрді.

Еркін ҚАТБЕКОВ,
журналист,
Қордай ауданы