Филология ғылымдарының кандидаты, жазушы, академик Меңдібай Әбіловтың айтуынша, Жылан жылы өте жақсы, жайлылығымен ерекшеленетінін айтады. Жылан өте ақылды, суық жануар. Яғни сергек сана мен ұстамдылықтың жылы болмақ екен.

– Тарихшылар мен әдебиетшілер алдыңғы Жылан жылдарының жайсыз болғанын айтып жүр. Рас, сонау 1905 және 1917 жылдардағы төңкерістер, 1929 жылғы әлемдік экономикалық дағдарыс, 1941 жылы Ұлы Отан соғысының басталуы Жылан жылының еншісінде. Дегенмен әр жыл өзінің несібесін, ризығын ала келетінін ұмытпау керек. Өткен-кеткен жайсыз оқиғаларды айтып, жұртты дүрліктірудің қажеті шамалы. Соғыс та, бүлік те, жақсылық та, жамандық та адамның қолымен жасалады. Осыны ұмытпайық. Босағадан аттағалы тұрған жылға «Төрлет!» деп есігімізді айқара ашып, жарқын мінезбен қарсы алайық. Жылан – шығыс танымында даналықтың символы. Бұл жылы сабырлы, «жеті рет өлшеп, бір рет кесуді» құптайтын адамдардың жолы болады деседі. Жылан жылы үйленгендердің шаңырағы биік, отбасы берік, ал биыл дүниеге келген сәбилер бала кезінен талантты, ақылды болады деп есептеледі. Сондай-ақ қазақта «жыланды үш кессе де кесірткелік әлі бар» дейді. Осы күнге дейін қазекем алда-жалда жыланды өлтіріп алса, жеті бөлікке бөліп, бөлек-бөлек көміп тастайды. Яғни жыланның күш-жігері, өмір үшін күресе білетін қабілеті әлеуметтік кедергілерден шаршағандарға әбден үлгі болуы керек деп ойлаймын, – дейді ғалым Меңдібай Әбілұлы.

Ал астролог Дмитрий Шимконың айтуынша, 2025 жыл өзгерістер мен даналық жылы болады деп күтілуде. Жылдар бойы басынан қиындық арылмағандар осы жылғы сәттілікке сенгендері жөн екен.

– Адамдардың махаббатта, жеке өмірде жолы болады. Жылан мүшелге өзінің айлакерлігі арқылы енген. Кедейліктен арылып, байлыққа қадам басатын жыл ретінде Жылан жылын қалай жақсы көрмеуге болады? Кез келген адам жыл соңында өзінің істеген әрекеттеріне қарап баға береді. Жылды қорытындылайды. Сіздер де өз-өздеріңізге есеп беріңіздер. Арыңыздың алдында таза болыңыз. Жылан тазалықты, сұлулықты, байлықты жақсы көреді. Барлық халықта «Жылан жүрген жерде алтын бар» деген тәмсіл бар. Жыланның өзі отты жылан және жасыл жылан болып күнтізбеде екіге бөлінеді. Биылғы жыл жасыл жылан жылы. Жасыл изумруд түстер сәнге енеді. Ал жасыл доллардың, байлықтың түсі, – деді Дмитрий Шимко.

Жаңа жылға байланысты сәуегейлер де, нумерологтар да, астрологтар да түрлі болжам жасауда. Нумеролог Құралай Бақытқызы алдағы жылды ағаш жылы деп атап, әлемде болып жатқан соғыстардың тоқтайтынын жеткізді.

– Біз сандармен жұмыс істейміз. Жыл санының қосындысы 9-ды құрайды (2+0+2+5=9). Бұл сан нумерологияда даналық пен рухани өсу символы ретінде қарастырылады. Сондықтан көптеген адам өздерінің біліктілігін арттырып, өмірлік миссияларын анықтауға тырысады. Шет тілдерін, соның ішінде қазақ тілін үйренуге деген қызығушылық артуы мүмкін. Сонымен қатар 2025 жыл, Қытай жұлдызнамасы бойынша, ағаш элементімен байланысты жылан жылы болып табылады. Бұл жыл баяу, бірсарынды өтеді деп күтілуде. Ағаш элементі шығыс бағытты білдіретіндіктен Қытай және басқа шығыс елдерімен сауда-саттық пен бизнес байланыстары нығая түседі, – дейді нумеролог.

Тағы бір нумеролог Клара Күзденбаеваның айтуынша, 2025 жыл – тоғыздықтың жылы, яғни барлық жамандықтан құтылып, қажетсіз қарым-қатынастарды тоқтатып, өмірімізді тазартуға арналған кезең. Бұл жыл қорытынды жасау және жаңа бастамаларға дайындалу уақыты ретінде сипатталады.

Дегенмен Қазақстан мұсылмандары діни басқармасының (ҚМДБ) Ғұламалар кеңесі нумерология және оған ұқсас болжамдарға сену шариғатқа қайшы екенін ескертеді. Дін мамандары адамның тағдырын сандармен болжау және оған сену ислам дінінде құпталмайтынын айтады.

Әрине, алдағыны бір Алла біледі. Мүмкін айтылған болжамдар дәл келер, келмес, ең бастысы еліміз аман, жұртымыз тыныш, табысымыз толымды, бақ-берекеміз мол болғай!

Эльмира БАЙНАЗРОВА