Қазақстандық мектеп оқушылары 2024 жылдың 30 желтоқсанынан бастап 2025 жылдың 8 қаңтарына дейін қысқы демалыста болады. Демалыс мерзімінде оқушылардың бос уақытын тиімді өткізу және жеке қасиеттерін дамыту мақсатында бірқатар іс-шаралар ұйымдастырылады. Бұл туралы Оқу-ағарту министрлігінің баспасөз қызметі хабарлады.

Демалыс аясындағы іс-шаралар:

«Біртұтас тәрбие» бағдарламасы бойынша оқушылардың белсенділігін арттырып, пайдалы да қызықты уақыт өткізуге бағытталған іс-шаралар жоспары жасалды:

«Қыста кітап оқимыз, жадымызға тоқимыз» мектепішілік акциясы («Оқуға құштар мектеп» жобасы аясында);

Театр фестивальдері мен қойылымдар;

Жаңа жылдық әшекейлер жасау бойынша шеберлік сабақтары;

Қауіпсіздік сабақтары (жол қозғалысы, өрт қауіпсіздігі, киберқауіпсіздік);

Мұражайларға, ғылыми орталықтарға және тарихи ескерткіштерге танымдық экскурсиялар;

Спорттық ойындар, коньки, шаңғы тебу;

Қайырымдылық акциялары және басқа да мәдени, шығармашылық шаралар.

Балалар қауіпсіздігі – басты назарда

Іс-шаралар барысында балалардың қауіпсіздігін қамтамасыз ету басты міндет ретінде қарастырылуда. Бұл бағытта ата-аналармен бірлесе отырып:

Жол-көлік жарақаттарының алдын алу;

Көшедегі қауіпсіздік ережелерін сақтау;

Үйдегі өрт қауіпсіздігі және интернеттегі киберқауіпсіздік мәселелеріне ерекше көңіл бөлінеді.

Барлық іс-шаралар білім беру ұйымдарына әдістемелік ұсынымдар ретінде жолданады және мектептер бұл ұсыныстар негізінде жоспар құра алады.Балалардың демалысы – олардың дамуы мен қауіпсіздігіне арналған ерекше кезең!