Шектеулердің енгізілуінің негізгі себебі – телефон алаяқтығы мен SIM-карталарға байланысты қылмыстарды азайту. Министрліктің мәліметі бойынша, SIM-карталардың көптеп сатылуы телефон алаяқтығы мен киберқылмыстың көбеюіне алып келіп отыр. Соңғы жылдары цифрлық алаяқтық оқиғаларының саны артып, қоғамда алаңдаушылық тудырғандықтан осындай шараларға қажеттілік туындаған.

Вице-министр Асхат Оразбек шектеулердің нақты шарттары мен мөлшері әлі анықталмағанын атап өтті. Дегенмен министрліктің жоспары азаматтардың қауіпсіздігін қамтамасыз етуге бағытталған. Жеке тұлғалар мен заңды тұлғаларға сатылатын SIM-карталардың санына шектеу қойылуы олардың заңды пайдаланылуын бақылауға мүмкіндік береді.

Бұған қоса министрлік SIM-карталардың айналымын бақылау және киберқауіпсіздікті қамтамасыз ету үшін тиісті шаралар қабылдайтынын мәлімдеді. Сондай-ақ бұл қадамдар мемлекеттік органдар мен байланыс операторларының бірлескен жұмысы аясында жүзеге асырылатын болады.

Жалпы SIM-карталарға шектеу енгізу – заманауи қауіпсіздік талаптарына сәйкес халықтың және бизнестің қауіпсіздігін қамтамасыз ету үшін маңызды шара болып табылады. Бұл бастама өз кезегінде цифрлық ортада қауіпсіздікті арттыруға және алаяқтық әрекеттердің алдын алуға бағытталған.

«Курсив» сайтының жазуынша, бұған дейін Мәжіліс отырысында ЖСДП фракциясының басшысы Асхат Рахымжанов киберқылмыс мәселесін көтеріп, ұялы байланыс операторлары Қазақстан азаматтарының деректерінің құпиялығын қамтамасыз етіп отырған жоқ, ондай деректерді алаяқтарға беріп жіберуі мүмкін деп мәлімдеген.

Қазақстандағы операторлар SIM-картаны кеңселерінде немесе диллерлер арқылы сатады. Бірнеше жыл бұрын Үкімет абоненттерді IMEI-код арқылы телефон нөміріне және жеке сәйкестендіру нөміріне (ЖСН) жалғауды міндеттеген. Мұны гаджет ұрлығымен және алаяқтықпен күрес үшін қажет деп түсіндірді.

Айжан ӨЗБЕКОВА