Тарихи туындының сценарийін Мұрат Есжан мен ақын, жазушы Ұларбек Нұрғалым жазған. Сериалдың негізгі идеясы – ұлт ұстазының бейнесін, ұлағатты ойын кейінгі ұрпаққа таныту. 

Жалпы тарихи тұлғалар туралы фильм түсіру оңай емес. Көрермен де тарихи жобаларға сыни көзбен қарайтыны анық. Айта кетерлігі, сериалда тек Ахметтің ғана тұлғасы көрсетілмеген. Тарих беттерінде есімдері алтын әріппен жазылған ұлы тұлғаларымыз да қамтылған. Сол кезеңдегі азаматтардың арасындағы саяси көзқарастардың әралуандығы, талас-тартыстар да фильмге арқау болған. Телехикаяда ерекше есте қалған тұлғаның бірі – Міржақып Дулатов. Ахметтің сенімді серігі ретінде тұлғалық образы жақсы ашылған. Көркемдік тұрғыдан қарағанда, телехикаяда Міржақып пен Ахметтің бейнелерінде мінезі жағынан үйлесім бар. Ахаңның сабырлылығы мен байсалдылығы, Міржақыптың тік, өршіл мінезі бір-бірін жақсы толықтырған.

Жақында «Ахмет.Ұлт ұстазы» фильмінің шығармашылық тобы Тараз қаласындағы Шерхан Мұртаза атындағы мектеп-гимназия ұжымымен кездесті. Жиынға арнайы шақыртумен келген фильмнің режиссері Мұрат Есжан мен белгілі актер Байғали Есаналиев қатысты. 

Телехикаяның режиссері кездесуде түсірілім кезіндегі қызықтар және қиындықтармен бөлісті. 

– «Хабар» телеарнасында жүргенімде Ахмет туралы деректі телехикая түсірсем деген арманым болды. Өнегелі өмірінен фильм түсіруге тұрарлық бірден-бір тұлға кім десе, ойланбастан санама Ахмет Байтұрсынұлы түсер еді. Ахаңның 150 жылдығына орай Ахмет жайлы фильм түсіру «Qazaqstan» телеарнасының жоспарында болған. Бірақ телеарна басшылығы фильмді басқа режиссерге түсіртпек болған. Бір күні телеарна басшысы хабарласып, басқа бір тұлғаның өмірінен фильм түсіруді ұсынды. Мен бас тарттым. «Оған ешқандай дайындығым жоқ. Ал Ахмет болса, оған келісер едім» деп едім, көп өтпей телеарна басшылары қайта хабарласып, «Айтқаныңыз болсын, Ахметті сіз түсіріңіз» деді. Өз аузымнан шыққан сөз болғандықтан шегінерге жол қалмады. Екінші тұрғыдан, маған мұндай мүмкіндікті енді кім береді деген оймен тәуекел деп іске кірістім. Басқа ешқандай мақсат болған жоқ. Сондықтан маған осындай мүмкіндік берген, Ахаңдай ұлы тұлға туралы фильмді сеніп тапсырған телеарна басшыларына алғысым шексіз. Олар мені қолдарынан келгенше қолдап, шығармашылық еркіндік берді. Соған дән ризамын! – деді режиссер Мұрат Есжан.

Қатысушылар кеш соңында өздерін қызықтырған сұрақтарын қойып, тұшымды жауап алды.

Аяжан ДӘУЛЕТБЕКҚЫЗЫ