Акцияның басты мақсаты – аз қамтылған, көпбалалы отбасылардан шыққан оқушыларға және ата-анасының қамқорлығынсыз қалған балаларға оқу жылының басталуына дайындық кезінде материалдық көмек көрсету, балалардың әлеуметтік себептер бойынша мектепке бармауының алдын алу.Ата-аналардың алғысы мен бүлдіршіндердің ризашылығына бөленетін дәстүрлі акцияда бірлестік өкілдері 30 баланы мектепке қажетті оқу құралдарымен қатамасыз етті. 

Жиында  бірлестік жетекшісі Мухабат Абдрахманқызы және «Қоғамдық келісім» мекемесі басшысының орынбасары Дәурен Тайлеев балаларды әне-міне басталатын жаңа оқу жылымен құттықтады.

– «Мектепке жол» акциясы көп жылдан бері жүйелі жалғасып келеді. Алдағы уақытта акцияның ауқымы бұдан да кеңейеді деген сенімдемін. Сондықтан барлық азаматты қайырымдылық акциясынан шет қалмай, мүмкіндігінше атсалысуға шақырамын. Бүгінгі іс-шараға үлес қосқан әрбір жанға алғысым шексіз, – деді Мухабат Турдыева. 

Акция аясында балаларға базарлық таратылып қана қоймай, оларға сәні мен сәулеті келіскен «Достық» үйінің ішкі көрінісі көрсетіліп, түрлі аниматорлық ойын-сауықтар, сабын көпіршіктерінен шоу ұйымдастырылды. Өз кезегінде акцияға қатысқан ата-аналар да бірлестік мүшелеріне ризашылығын білдіріп, алғыстарын жеткізді.

А.ОРЫНБАСАРҚЫЗЫ