Өткен жылы 30 жылдан астам уақыт ішінде алғаш рет полиция департаментінің бастығы Арманбек Баймурзиннің бастамасымен Шу алқабындағы жабайы қарасораның нақты өсу картасын жасау бойынша зерттеу жұмыстары жүргізілді. Жоба қорытындысы бойынша, жабайы қарасора алқаптарының 138 мың гектардан 62 мың гектарға дейін қысқарғаны анықталды. 
Алынған мәліметтерді «Қазақстан Ғарыш Сапары»  акционерлік қоғамы  аэрографиялық түсірілім жолымен растады.

Жаңа картаға сәйкес өсу аумағы Меркіден (- 65 мың га) Т.Рысқұлов ауданына (+ 9,5 мың га) ауысты.
Полиция елдегі есірткі жағдайын айтарлықтай тұрақтандыруға мүмкіндік беретін жаңа деректерді ескере отырып, есірткі бизнесіне қарсы күресте жаңа тәсілдерді қолдана бастады.
Карта полицияға жабайы қарасора өсетін нақты аудандарға жүйелі бақылау жүргізуге, тыйым салынған заттарды дайындаумен де, тұтынумен де айналысатын адамдарды анықтау бойынша жұмысты күшейтуге мүмкіндік береді.

– Біздің қызметкерлер есірткі жеткізу арналарын анықтау және жою, ұйымдасқан қылмыстық топтар қызметінің жолын кесу бойынша жүйелі жұмыстар жүргізуде. Сондай-ақ олар шабу және өртеу арқылы каннабистің өсу ошақтарын жояды. Енді жаңартылған деректермен бұл жұмыс екі есе тиімді болады. Полицейлер қарасора дайындаушыларды анықтау үшін оның әрбір учаскесін мұқият зерттейді, – деп атап өтті облыстық полиция департаменті есірткі қылмысына қарсы іс-қимыл басқармасының бастығы Әлім Бажықбаев.Жалпы есірткі тасымалдау, оны саудалаудың жолын кесу жұмыстары облыста қарқынды жүруде. Жуырда есірткі сатушылардан 5,5 миллион теңгеге «мефедрон» тәркіленген болатын. Ұсталғандар уақытша ұстау изоляторына қамауға алынды.

Айжан ӨЗБЕКОВА