![Дәрігерлер дән риза](https://arainfo.kz/uploads/resized-images/2023/10/21b4813a45eeec1034e37d5a8f63fcbc_1280x720.jpg)
Дәрігерлер дән риза
Бүгінде Президент бастамаларының басым көпшілігі жүзеге асты. Бірқатар жұмыс жалғасып жатыр. 2020 жылдан бері дәрігерлердің айлығы да айтарлықтай көбейді. Қазір олардың табысы еліміздегі орташа жалақыдан әлдеқайда жоғары. Жұртқа зейнетақы жинағының бір бөлігін пайдалану мүмкіндігі берілді. Миллионға жуық адам осы жобаның игілігін көрді – тұрғын үй мәселесін шешіп, баспаналы болды.
Қазір ауылдық жерде 300-ден астам денсаулық сақтау нысаны салынып жатыр. «Ұлттық қор – балаларға» жобасы қолға алынды. Соның арқасында жаңа жылдан бастап балалардың есепшотына қаражат түсе бастайды. Расында, көп жұмыс атқарылды, болашақта да бұл іс өз жалғасын табады деп сенеміз.
Өзімізге мәлім, былтырдан бері елімізде ауқымды саяси жаңғыру жұмыстары жүргізілді. Небәрі бір жарым жылдың ішінде көптеген өзгеріс жасалды. Оған баршамыз куәміз, реформаны жүзеге асыру үшін белсенді түрде жұмыс істеп келеміз. Алайда нағыз дамыған ел боламыз десек, саяси реформалармен шектеліп қалмауымыз керек. Осы жұмысты түбегейлі және жан-жақты әлеуметтік-экономикалық реформаға ұштастыруымыз қажет.
Бір сөзбен айтқанда, адамзат тарихында бұрын-соңды болмаған сын-қатерлер мен түбегейлі өзгерістер дәуірі басталды. Осындай аса маңызды шақта зор экономикалық серпіліс жасауға еліміздің толық мүмкіндігі бар. Ол үшін біз біртіндеп жаңа экономикалық үлгіге өтуіміз керек. Бұл жұмысты батыл жүргізуіміз қажет. Басты мақсат – қағаз жүзіндегі биік жетістіктерге қол жеткізу емес, шын мәнінде, халықтың тұрмыс сапасын жақсартуға бет алуымыз қажет.
«Әрбір адам ісі мен сөзі бір жерден шығатын Адал азамат болсақ, әділдік орнайды. Қазақстан – біздің жалғыз ғана Отанымыз. Оның іргесі берік, керегесі кең, төрт құбыласы түгел болуы – өз қолымызда. Бабалардан мирас болған ұлан-ғайыр жерді қорғау, оны өркендету – біздің перзенттік парызымыз», деп Мемлекет басшысының Жолдауында орынды айтылған.
Динара КӘРІБАЕВА,
облыстық оңалту орталығының бас дәрігері
Келесі мақала