Облыс әкімі Нұржан Нұржігітовтің төрағалығымен өткен кеңесте Байзақ ауданының даму жоспары қаралды. Әлеуметтік-экономикалық жоспарлар және өзекті мәселелер туралы баяндаған аудан әкімі Бақыт Қазанбасовтың айтуынша, 2025 жылға дейін инвестициялық 7 ірі және 101 шағын жобаны жүзеге асыру көзделіп отыр. Нәтижесінде жалпы 1250-ге жуық жаңа жұмыс орындары ашылмақ. Бұдан бөлек, 258 бюджеттік жоба жоспарланған. Олардың басым бөлігі тұрғын үй, ауызсу, электрмен қамту, жол жөндеу, газбен қамту, білім, денсаулық, мәдениет салаларына қатысты. Қазіргі таңда аудандағы 43 елді мекеннің 28-і таза ауызсумен, 42-сі газбен қамтылған. 2025 жылға дейін ауылдарға толығымен ауыз су тарту, ағымдағы жылы газ тарту мәселесі 100 пайызға шешілмек. Аймақ басшысы әр жобаны жеке-жеке талқылап, ол бойынша тиісті басқармалар мен аудандық бөлім басшылары, ауылдық округ әкімдерінен жауаптар алды. – Бюджеттік жобалармен шектелмей, бізге қосымша қаражат көздерін табу, инвесторлар тарту қажет. Ең бастысы – тұрғындардың тұрмысын жақсарту, табысын арттыру. Ауыл әкімдерінің жұмысын күшейту керек. Олар ауылдағы әрбір үйдің жағдайымен жіті таныс болуы тиіс, – деді Н.Нұржігітов. Ауданда жұмыс орындарын құрудың өңірлік картасына сәйкес 2022-2025 жылдары 8300-ден аса жаңа жұмыс орындары ашылады деп күтілуде. Оның 2730-ы тұрақты жұмыс орындары. – Мемлекет басшысының әрбір 10 мың тұрғынға 100 жаңа жұмыс орнын құру тапсырмасы орындалуы тиіс. Әр отбасының тұрақты табысының болуы маңызды. Осы бағытта жұмыс істеу керексіздер, – деді облыс әкімі. Аймақ басшысы әр ауылдық округтің атқарылатын жобалары бойынша жоспарының болуы, ауылдар бір бағытта жүйелі жұмыс істесе ғана нәтижеге қол жететінін баса айтты. Сондай-ақ басқарма басшылары мен аудан әкімдеріне халықпен тығыз қарым-қатынаста жұмыс істеудің маңыздылығын атап өтті. – Мәселені анықтап қана қоймай, оның шешу жолдарын да қарастырыңыздар. Өздеріңіз ауылдарға барып, халықпен сөйлесіп, ұсыныс-пікірлерін тыңдаңыздар. Кәсіпкерлер, шаруалармен кездесіңіздер, – дей келе Нұржан Нұржігітов бірқатар жобаларды салалық басқармалармен бірлесіп қайта пысықтауды тапсырды.

Облыс әкімінің баспасөз қызметі