Облыс әкімінің өкімімен Әбдібеков Данияр Темірбекұлы облыс әкімдігі құрылыс басқармасының басшысы болып тағайындалды. Данияр Темірбекұлы 1969 жылы туған. Ол Қырғыз мемлекеттік құрылыс, көлік және сәулет университетін «Құрылыс», Орталық-Азия университетін «Құқықтану», Қазақстан Республикасы Президентінің жанындағы Мемлекеттік басқару академиясын «Мемлекеттік және жергілікті басқару» мамандықтары бойынша бітірген. Еңбек жолын 1989 жылы аудандық жеміс-көкөніс базасында жұмысшы болып бастаған. Әр жылдары Алматы облыстық жылжымайтын мүлікті тіркеу және бағалау басқармасы Қаскелең аудандық агенттігінің маманы, Қарасай аудандық сәулет және құрылыс комитетінің инженері, Алматы облысының жылжымайтын мүлік орталығының Қарасай аудандық филиалы басқарушысының орынбасары, басқарушысы болған. Сондай-ақ Алматы облысы бойынша мемлекеттік сәулет-құрылыс бақылау және лицензиялау департаменті директорының орынбасары қызметін атқарған. 2015 жылғы қарашадан бастап бүгінгі күнге дейін Алматы облысының мемлекеттік сәулет-құрылыс бақылау басқармасының басшысы лауазымында еңбек етті.