Уақытты жоғалтуға мүмкіндік болмады. Санитарлық авиация тікұшағы дереу әуеге көтеріліп, Жамбыл облыстық көпбейінді балалар ауруханасының дәрігерлері оқиға орнына жетті.

Нейрохирург Мирдас Мурадов пен анестезиолог-реаниматолог Бахтияр Баялиев аудандық аурухана деңгейінде өмір сақтайтын аса күрделі декомпрессионды трепанация операциясын сәтті орындады. Бұл ота науқастың өміріне тікелей қауіп төнген жағдайда ғана жасалады және дәрігерлер үшін ең жауапты, қиын шешімдердің бірі саналады.

Баланың жағдайы тұрақталған соң, дәрігерлер консилиумының шешімі бойынша санитарлық авиация арқылы Жамбыл облыстық көпбейінді балалар ауруханасына жеткізілді. Тікұшақта науқас реаниматолог-дәрігер Ербол Алимкулов пен фельдшердің қатаң бақылауында болды.

Қазіргі таңда балаға барлық қажетті медициналық көмек толық көлемде көрсетілуде. Бұл оқиға – ақ халатты абзал жандардың адам өмірін бәрінен биік қоятын шынайы ерлігі.