Аккредитация Қазақстандық дәнекерлеу қауымдастығы KazWeld тарапынан Халықаралық дәнекерлеу институтының International Institute of Welding (IIW) талаптарына сәйкес жүргізілді. Нәтижесінде Шахтинск технологиялық колледжінің аталған мамандық бойынша білім беру бағдарламасы халықаралық деңгейге сай деп танылды.

Сараптама барысында білім беру бағдарламалары, материалдық-техникалық база, оқытушылардың кәсіби деңгейі және студенттердің практикалық даярлығы кешенді түрде бағаланды. Қорытындысында колледждің халықаралық салалық стандарттарға толық сәйкес келетіні анықталды.

Аккредитация нәтижесі педагогтер мен білім алушылардың кәсіби дайындығының жоғары екенін көрсетті. Бірқатар оқытушылар мен өндірістік оқыту шеберлері халықаралық мәртебеге ие болды. Сонымен қатар 2–3 курс студенттері арасынан 10 білім алушы халықаралық практикалық аттестациядан сәтті өтті.

Бұл аккредитация студенттерге халықаралық талаптарға сай практикалық даярлықтан өтуге мүмкіндік беріп, түлектердің отандық және шетелдік өнеркәсіп кәсіпорындарында жұмысқа орналасу мүмкіндігін кеңейтеді.