«Қазгидромет» мәліметіне сәйкес, қараша айында Қазақстанның бірнеше өңірінде ауа температурасы тарихи максимумдарға жетті.

Ақтөбеде 14 қарашада +13,2°C тіркеліп, 2023 жылғы рекорд жаңартылды. Келесі күні +11,4°C байқалды, бұл 2001 жылғы көрсеткіштен жоғары. Көкшетауда 19 қарашада +8,3°C, 23 қарашада +5,2°C тіркеліп, бұрынғы рекордтар жаңарды.

Жезқазғанда 24–26 қараша аралығында үш күн қатарынан рекорд орнатылды: +13,3°C, +10,3°C және +12,3°C. Қарағандыда 26 қарашада +9,4°C тіркелді.

Қарашада ауа массаларының ауысуына байланысты жауын-шашын, тұман, көктайғақ және желдің күшеюі байқалды. Мысалы, Шуылдақта бір тәулікте 28 мм қар жауып, айлық норманың үштен бірінен асты, ал Жетісу облысында жел секундына 36 м-ге жетті.

Астанада қарашадағы орташа температура +0,3°C болып, климаттық нормадан 5,5°C жоғары болды. Ең төменгі температура -12,3°C, ең жоғары +7,8°C. Ай ішінде жауын-шашын мөлшері 63 мм, көпжылдық орташа мәннің 217%-ына тең болды.