24KZ телеарнасының мәліметінше, Өнеркәсіп және құрылыс министрлігі жылдық шекті мөлшерлемені бұрынғы 45%-дан 36%-ке дейін төмендетті. Бағдарлама автокөлік сатып алу мүмкіндігін кеңейтіп, халыққа қолжетімділікті арттыруды көздейді.

Автонесиеден айырмашылығы — автолизинг арқылы көлікті алғашқы жарнасыз және несие рәсімдемей-ақ ұзақ мерзімге жалға алуға болады. Келісімшарт мерзімі аяқталған соң автомобильді кері қайтару немесе қалған берешекті өтеп, толықтай сатып алу мүмкіндігі қарастырылған.

Қазақстан Парламенті Мәжілісінің депутаты Олжас Құспековтің айтуынша, бұл бағдарламаның тиімді жүруі үшін екінші деңгейлі банктерді қатыстырмау маңызды.

«Бұл жерге екінші деңгейлі банктерді кіргізбеу керек. Егер оларды кіргізсек, бұл ертеңгі күні кәдімгі автонесиеге айналып кетеді. Сондықтан бөлек компания құрылуы қажет», — деді депутат.

Жаңа автолизинг тетігі отандық автомобиль нарығын жандандырып, азаматтарға көлік иеленудің баламалы жолын ұсынбақ.