Шараға «Абай ТВ» телеарнасының бас продюсері Жаңылхан Асылбекова, режиссер Ботагөз Исмаил, ҚР Ұлттық кітапханасының қызметкері Қайырниса Жұмашева, Қазақстанның Құрметті құрылысшысы Сыздық Борсабаев және басқа да қонақтар қатысты.

Кештің мақсаты – ақынның поэзиясы мен журналистикадағы еңбегін жас буынға кеңінен таныстыру, ұлттық құндылықтар мен туған жерге сүйіспеншілікті насихаттау. Шара ақын туралы бейнероликпен басталып, «Сен берген гүл» туындысының сахналық көрінісі көрсетілді. Ақынның Тараз қаласына арналған өлеңдері оқылып, көрерменге әсерлі рухани лирика ұсынылды.

Ғайни Әлімбекқызының 30 жылдық тележурналистикадағы еңбегі, «Айна», «Айша бибі», «Өмір-өткел» секілді бағдарламалары мен деректі фильмдерінің өңірлік журналистикаға қосқан үлесі атап өтілді. Қонақтар оның шығармашылығын жоғары бағалап, ұлттық рух пен адамгершілік құндылықтарын дәріптейтін туындыларының маңызын атап өтті.

Әдеби-сазды кеш көрерменге ерекше рухани әсер сыйлап, ақын шығармашылығының тереңдігін танытты. Қонақтар ұйымдастырушыларға алғыс білдірді.