Қытайдың Xi’an Jiaotong University базасында «Шәкәрім» Қазақ-Қытай мәдени зерттеулер орталығы салтанатты түрде ашылды. Орталық Шәкәрім Құдайбердіұлының шығармашылығы мен қазақ мәдениетін Қытайда кеңінен танытуды көздейді.

Шара «Бір белдеу – бір жол» бастамасы аясындағы халықаралық ғылыми-инновациялық конференция барысында өтті. Конференцияда сонымен қатар Шәкәрім университетіне «Электрлік автоматтандыру жөніндегі Қазақстан-Қытай бірлескен зертханасын» жабдықтауға арналған алғашқы құрал-жабдық партиясын беру туралы сертификат табысталды.

Іс-шараға Қазақстан делегациясын ҚР Ғылым және жоғары білім вице-министрі Гүлзат Көбенова және Shakarim University ректоры Думан Орынбеков бастап барды. Бірлескен зертхана ашу туралы келісім 2025 жылы Астанада өткен «Орталық Азия – Қытай» индустриялық-инвестициялық форумында жасалған болатын.

Зертхананың мақсаты – өңірдегі инновацияларды дамыту, өндіріс пен ғылым байланысын нығайту, автоматтандыру және логистика саласында жаңа технологиялар енгізу. Жоба Абай облысының инновациялық экожүйесіне интеграцияланбақ.

Вице-министр Гүлзат Көбенова бұл бастама Қазақстанның инновациялық даму бағытымен үндес екенін атап өтті:

«Ғылым мен технология саласындағы осындай серіктестік – интеллектуалды ұлт қалыптастыруға жасалған нақты қадам».

Жаңадан ашылған «Шәкәрім» орталығы – ұлы ойшылға арналған шетелдегі алғашқы ғылыми-мәдени институция. Мұнда келушілер Шәкәрім Құдайбердіұлының өмірі мен мұрасы жөнінде қазақ және қытай тілдерінде мәлімет ала алады, сондай-ақ қазақ халқының мәдени дамуына қатысты материалдармен танысады.

Shakarim University ректоры Думан Орынбеков орталықтың ашылуын екі ел арасындағы сенім мен достықтың маңызды белгісі деп атады:

«Бұл орталық мәдениеттерді, идеяларды және ұрпақтарды байланыстыратын көпір болатынына сенімдімін», – деді ол.