Әбиірбек 2023 жылдың күзінде Тараз қаласынан әскерге шақырылып, өз ықыласымен Отан алдындағы азаматтық борышын өтеуге аттанған. Әскери міндетін өтеуге шақырылған жастар Ақтаудағы теңіз жаяу әскері бригадасына жеткізілгенде, ол екінші артиллериялық дивизионның құрамына қабылданып, артиллериялық барлау бөлімшесінің командирі болып бекітіліпті.

– Әскер маған төзімділікті, жауапкершілікті үйретті. Сарбаз өмірі жинақылық пен тәртіпке баулыды, ерік-жігерімді шыңдады. Онда жүргенде нағыз жауапкершілікті сезінесің, ойланып шешім қабылдауға машықтанасың. Әскерге барғаныма ешқашан өкінбедім. Әскер әрбір сарбаздың мінезін сынап, кімнің шын батыр, кімнің әлсіз екенін айқындайды

Ал командирлер бөлімшені басқаруды тапсырғанда жауапкершіліктің салмағын сезіндім, – дейді Әбиірбек.

Сондай-ақ кейіпкеріміздің жауынгерлік даярлықтағы жетістіктері мен тәртібі ескеріліп, 2024 жылы «Sarbaz 2.0» бағдарламасы арқылы мемлекеттік білім грантын иеленген екі мыңнан астам сарбаздың қатарына қосылды.

Бағдарлама 2023 жылдан бастап Қорғаныс министрлігінің бастамасымен жүзеге асырылып келеді. Бағдарлама шақырылушыларға қызметтен кейін ҰБТ тапсырмай-ақ жоғары оқу орнына түсуге мүмкіндік береді. Үздік сарбаздар мемлекеттік грант иегері атанып, онлайн форматтағы тест тапсырып, құжаттарын «eGov» порталы арқылы өткізеді.

Әбиірбек осы байқаудан сүрінбей өтіп, әл-Фараби атындағы Қазақ ұлттық университетінің «Экономика және бизнес» факультетіне оқуға түседі. Таңдаған мамандығы – логистика.

– Әскерде жүргенімдеде өмірден не қалайтынымды анық түсіндім. Мемлекеттік грант иеленгенім еңбектің ешқашан зая кетпейтінін көрсетті, – дейді ол.

Әбиірбектің әкесі Ақыл Тұрсынбеков те кезінде әскер қатарында болып, Отан қорғауды абырой санаған жан. Ұлының жетістігіне ерекше мақтанады.

– Әскер баламды шыңдап, азамат етіп оралтты. Бұрынғы балаң мінезін тастап, қайратты, мақсатты жігіт болып келді. Бүгінде ол отбасына ғана емес, елге де үлгі боларлық азаматқа айналды. Оның әрбір сөзі мен ісінен жауапкершілік сезіледі. Ұлымның қанаттанып, өз жолын тауып келе жатқанына қатты қуаныштымын. Біз үшін оның жетістігі – үлкен мәртебе, – дейді әкесі.

«Sarbaz 2.0» бағдарламасы жастардың әскерге көзқарасын түбегейлі өзгертіп, болашаққа жол ашатын баспалдаққа айналды.

Осылайша бір жылдық қызмет оқудан қол үзіп қалу емес, қайта білімге жетелейтін жаңа мүмкіндіктің кілтіне айналғаны дәлелденді.

Ақтоты ЖАҢАБАЙ