Өз сөзінде ол «Astana Finance Days» бүгінде 70-тен астам елдің инвесторларын, бизнес қауымдастығы мен мемлекеттік құрылымдарын тоғыстырған аймақтық деңгейдегі басты ынтымақтастық алаңына айналғанын және Қазақстанның ашықтығын айқындап, ынтымақтастық пен инновацияға деген берік ұстанымын дәлелдейтінін атап өтті.

Форумның өзектілігін елдің экономикалық көрсеткіштері де айқын дәлелдейді. 2025 жылғы қаңтар-шілде аралығында жалпы ішкі өнімнің  өсімі 6,3 пайызды құрап, оның ішінде нақты сектор 8,3 пайызға, қызмет көрсету саласы 5,2 пайызға артты. 2025 жылдың I тоқсанында тікелей шетелдік инвестициялар көлемі 6,6 миллиард АҚШ долларына жетіп, өткен жылмен салыстырғанда 6,2 пайызға өсті. Ал негізгі капиталға салынған инвестициялар 9,9 триллион теңгені құрап, 16,1 пайызға ұлғайды. Бұл деректер халықаралық серіктестердің қолдауын көрсетіп, Қазақстанның сенімді инвестициялық алаң ретіндегі мәртебесін растайды.

– Мемлекет басшысы алға қойған басты міндеттердің бірі – инвестиция тарту. Мақсат – 2029 жылға қарай экономиканың көлемін екі еселеу. Бұл үшін кемінде 150 миллиард АҚШ доллары  көлемінде тікелей инвестиция тартып, негізгі капиталға салынатын инвестициялардың жалпы ішкі өнімдегі үлесін 23 пайызға жеткізу қажет. Осы мақсатта қазірдің өзінде жаңа тетіктер енгізілді, соның ішінде инвестициялар туралы келісімдер мен басым жобаларға арналған «жасыл дәліз» механизмі бар, – деді Серік Жұманғарин.   

Астана халықаралық қаржы орталығы бұл міндеттерді жүзеге асыруда ерекше орын алады. Құрылған күнінен бастап Астана халықаралық қаржы орталығы  ағылшын жалпы құқығының қағидаттарына, тәуелсіз реттеу мен халықаралық стандарттарға негізделген бірегей институционалдық орта ұсынып келеді. Бүгінде орталық алаңында 85 елден 4 мыңнан астам компания тіркелген. Олар активтерді басқару мен финтехтен бастап, жасыл қаржы және исламдық банкингке дейінгі түрлі салаларды қамтиды. Осы компаниялардың Қазақстан экономикасына салған жалпы инвестиция көлемі 17  миллиард АҚШ долларынан асты. 

Сөз соңында Серік Жұманғарин серіктестерге бірлескен жобаларға белсенді қатысқаны үшін алғыс айтып, VIII «Astana Finance Days» форумының ынтымақтастықтың жаңа көкжиектерін ашып, ортақ игілікке қызмет ететін болашақты қалыптастыруда маңызды қадам боларына сенім білдірді.

Рrimeminister.kz