Орташа республикалық көрсеткіш 2,5 пунктке артып, 2023 жылғы 56,1 баллдан 58,6 баллға жетті. Бұл туралы Қазақстан Республикасы Оқу-ағарту министрлігінің баспасөз қызметі мәлімдеді.

Орташа деңгейден жоғары нәтиже көрсеткен сегіз өңірдің ішінде көш басында Ақтөбе облысы тұр — 64,6 балл (өткен жылмен салыстырғанда +5,6). Павлодар облысы да жоғары деңгейін сақтап қалды — 63,3 балл. Елеулі өсім Алматы қаласында (+6,9) және Қостанай облысында (+6,4) байқалды.

«Мемлекет басшысының тапсырмасына сәйкес 2022 жылдан бастап Қазақстанда Балалардың әл-ауқат индексі енгізілді. Бұл көрсеткіш өңірлер арасындағы нәтижелерді, халықаралық деңгейдегі индикаторларды салыстыруға мүмкіндік береді әрі қоғам назарын балалық шақ мәселелеріне аударуға бағытталған», — деді ҚР Оқу-ағарту министрлігі Балалардың құқықтарын қорғау комитетінің төрайымы Насымжан Оспанова.

Индекс төрт негізгі бағыттағы 56 көрсеткіштен тұрады: «Бала», «Отбасы және қоғам», «Мемлекеттік саясат» және «Елдің әл-ауқаты». Ол 35 статистикалық және 21 сауалнамалық дерекке негізделген. Көрсеткіштер бала денсаулығы мен дамуын, отбасылық және әлеуметтік ортаны, сондай-ақ білім беру, денсаулық сақтау, әлеуметтік қорғау, экология және инфрақұрылым салаларындағы мемлекеттік саясаттың тиімділігін қамтиды.