Бүгін Мемлекет басшысы Қасым-Жомарт Тоқаевтың Конституцияның 30 жылдығына арналған халықаралық ғылыми-практикалық конференцияда сөйлеген сөзінде Ата Заңның қоғамдағы абарой-беделін арттыру, сол арқылы қоғамдағы тұрақтылық пен ауызбіршілікті нығайту қажеттігін алға тартты. 

Ата Заңымыздың 1995 жылы 30 тамызда өткен бүкілхалықтық референдумда қабылдануы– еліміздің тарихындағы аса маңызды саяси оқиға. Бұл құжат Қазақстанның демократиялық, зайырлы, құқықтық және әлеуметтік мемлекет ретіндегі мәртебесін нақтылап берді. Онда халықтың билікке тікелей ықпалы, мемлекеттің құрылымдық жүйесі, билік тармақтарының теңгерімі айқын көрсетілген. Сондықтан да Конституцияны «Қоғамдық келісім мен тұрақтылықтың кепілі» деп атауға толық негіз бар.

Әрбір қазақстандықтың тең құқылы болуы, ар-ождан және сөз бостандығы, еңбек ету және білім алу мүмкіндігі – барлығы да Конституцияда тайға таңба басқандай жазылған. Бұл нормалар ел дамуының бағытын анықтап қана қоймай, әрбір азаматтың өміріне сенімділік береді. Сонымен қатар Конституция – елді демократиялық жолмен басқарудың басты тетігі. Ол билік тармақтарының өзара тепе-теңдігін сақтап, қоғамда әділдік пен заң үстемдігін қамтамасыз етеді. Конституциясыз мемлекет болуы мүмкін емес, өйткені ол – елдің саяси, әлеуметтік, экономикалық дамуының тұғыры.

Бүгінде Қазақстан әлемдік қауымдастықта өз орнын айқындап, жаңа белестерге қадам басып келеді. Бұл жолда халқымызға бағдар беретін шамшырағымыз – Ата Заң. Конституцияға сүйенген ел ешқашан адаспайды. Себебі ол – өткеннің тәжірибесін, бүгіннің талабын және келешектің мұратын тоғыстырған құндылық. Сөзімді қорыта айтсам, Қазақстан Республикасының Конституциясы – әрбір азамат үшін қасиетті құжат. Оны құрметтеу – Отанды құрметтеу, оны сақтау – Тәуелсіздікті сақтау. Сондықтан да біз үшін Ата Заңның мәртебесі қашанда биік, орны айрықша.

Дидар АПБАСОВ,

облыстық айтыскер ақындар,

жыршы-термешілер орталығының

ғылыми әдіскері