Пойыз бірінші, екінші және үшінші класты алты вагоннан тұрады және 374 жолаушыға арналған. Қазіргі уақытта барлық техникалық тексерулерден өткен пойыздың құжаттары Кеден одағының техникалық регламентіне сәйкес рәсімделуде.

Жаңа құрамның дизайнында инклюзивтілікке баса назар аударылған. Барлық класта биодәретханалар қарастырылған, оның ішінде мүмкіндігі шектеулі жандарға арналған арнайы кабиналар мен платформалық көтергіштер бар. Сонымен қатар, егде жастағы жолаушылар мен балалармен саяхаттайтын отбасылар үшін автоматты аяқ тіректері орнатылған.

Пойыздағы әрбір орын USB-қосқыштармен жабдықталып, жолаушыларға құрылғыларын қуаттауға мүмкіндік береді. Сондай-ақ, салқын сусындар мен жеңіл тағамдар ұсынылады.

Айта кетейік, бұған дейін "Жолаушылар тасымалы" АҚ "Астана – Қарағанды" бағыты бойынша Comfort+ форматындағы алты вагонды электр пойызын іске қосқан болатын. Ол 576 жолаушыға арналған.