Биыл Қазақстан Президенті Қасым-Жомарт Тоқаев 72 жасқа толып отыр. Дегенмен, Ақорданың баспасөз қызметі бұл датаға байланысты ешқандай мерекелік іс-шаралар ұйымдастырылмайтынын хабарлады. Президент бұл күнді салтанатты түрде атап өтпейді,бұл оның бұрыннан келе жатқан ұстанымы.

Қасым-Жомарт Кемелұлы 1953 жылы 17 мамырда Алматы қаласында дүниеге келген. Оның әкесі – Кемел Тоқаев – Ұлы Отан соғысының ардагері, қазақ детектив жанрының негізін қалаған танымал жазушы. Анасы – Тұрар Шабарбаева – Алматы шет тілдер педагогикалық институтында ұзақ жылдар еңбек еткен ұстаз.

Тоқаевтың мемлекеттік қызметтегі жолы – ширек ғасырдан астам уақытты қамтитын еңбекпен өрілген өмірбаян. 1975 жылы Мәскеу мемлекеттік халықаралық қатынастар институтын тәмамдаған ол, дипломатиялық мансабын КСРО Сыртқы істер министрлігінде бастап, кейін Сингапур мен Қытайдағы елшіліктерде қызмет етті. 1992 жылы тәуелсіз Қазақстанның Сыртқы істер министрінің орынбасары болып тағайындалғаннан бері еліміздің сыртқы саясатында жетекші рөл атқарып келеді.

1999 жылы Премьер-Министр лауазымына көтерілген Тоқаев, 2002 жылы Мемлекеттік хатшы – Сыртқы істер министрі ретінде қайта тағайындалды. Ал 2011 жылы ол БҰҰ Бас хатшысының орынбасары, Женевадағы бөлімшенің Бас директоры болып, халықаралық аренада беделін бекіте түсті.

2019 жылы 20 наурызда Мемлекет басшысы қызметіне кірісіп, 9 маусымда өткен сайлауда ресми түрде Президент болып сайланды. 2022 жылғы 20 қарашадағы кезектен тыс сайлауда 81,31% дауыс жинап, Қазақстан халқынан үлкен сенім мандатын иеленді.

Саяси тұлға ретінде Тоқаевтың бойынан байыптылық, халықаралық тәжірибе мен салқынқанды шешім қабылдай білу қасиеттері байқалады. Ол — халықаралық қатынастар бойынша 10 кітаптың авторы, саяси ғылымдардың докторы. Сонымен қатар, ол – үстел теннисі федерациясын ұзақ жылдар басқарған спорт жанашыры.

Қасым-Жомарт Тоқаев салауатты өмір салтын ұстанады, көркем әдебиет пен саяси мемуарларды оқуға қызығады. Әлемдік геосаясаттағы үдерістерге сергек қарап, Қазақстанның бейбіт бастамаларын алға тарту – оның негізгі ұстанымдарының бірі.