Жобаның негізгі мақсаты – ҚР Денсаулық сақтау министрлігі ұстанып отырған бағытқа сәйкес, алғашқы медициналық-санитарлық көмек деңгейінде ауруларды ерте кезеңде анықтау арқылы бюджет шығындарын азайту. Сонымен қатар, бұл бастама телемедицинаны пайдалану арқылы 2023-2027 жылдарға арналған қатерлі ісікпен күрестің кешенді жоспарын да жүзеге асырады.

Медициналық мекемелерде PACS (бейне мұрағаттау және байланысты жүйе) және жасанды интеллект жүйелерін енгізу нәтижесінде тәуекел топтары тиімді анықталып, тек нақты қажетті пациенттер ғана қосымша зерттеулерге жіберіледі. Бұл тәсіл медициналық мекемелердің техникалық мүмкіндіктерін барынша тиімді пайдалануға жол ашады.

Жобаның орталық және резервтік серверлері «Ұлттық ақпараттық технологиялар» акционерлік қоғамының деректер орталығына орнатылған. Мұнда облыстың барлық медициналық мекемелерінде жүргізілген рентгендік зерттеулер күн сайын жиналып, мұрағатталады. Құрылған бірыңғай қауіпсіз ақпараттық жүйе облыс деңгейіндегі ірі ауруханалардан бастап аудандық медициналық мекемелерге дейін біріктіреді.

Жоба шеңберінде аналогтық рентген аппараттары арнайы цифрландырғыштар арқылы жаңартылып, бейнелер жіберілетін жоғары жылдамдықты VPN арнасы орнатылды. Жергілікті желілер жаңартылып, серверлік жабдықтар қойылды. Радиологиялық ақпараттық жүйе, PACS мұрағаты, кескін өңдеу бағдарламалары, сонымен қатар сүт безі мен өкпе қатерлі ісіктерін анықтауға арналған жасанды интеллект жүйелері орнатылды.

Жасанды интеллект жүйесі дәрігерлерге өкпе мен сүт безі обырын ерте кезеңде анықтауға көмектеседі. Медицина мамандарының айтуынша, бұл екі онкологиялық ауру қазіргі кезде кең таралған. Әдетте, адамның көзі тек 5 миллиметрден асқан ісіктерді көруге қабілетті болса, жасанды интеллект 1 миллиметрден басталатын өзгерістерді анықтауға мүмкіндік береді. Бұл өз кезегінде ауруды ерте кезеңде емдеуді бастауға жағдай жасайды.

«AR-AI»-ақпарат