«Агроөнеркәсіп кешені экономиканың басты қозғаушы күштерінің бірі болуы тиіс. Бұл, ең алдымен, азық-түлік қауіпсіздігін қамтамасыз ету тұрғысынан маңызды. Ауыл тұрғындарының тұрмысы да осы салаға тікелей байланысты», деген Президент ауылшаруашылығы саласын бәсекеге қабілетті озық секторға айналдыру қажеттігін атап өтті.

Тәуелсіздік түлеткен осындай ауылдардың қатарына Нұрлыкент ауылдық округін де жатқызуға болады. Ауылдық округ әкімі Нұрсұлтан Рақымбектің айтуынша, Нұрлыкентті алда жарқын өзгерістер күтіп тұр.

– Ең алдымен халықтың әл-ауқатын жақсартуға басымдық берілуде. Былтыр жыл қорытындысымен 229 адам тұрақты жұмысқа орналасты. Жастарымызға мемлекеттік гранттар берілді. Нәтижесінде ауыл жастары өз кәсіптерін бастады. Сонымен қатар, әлеуметтік саланы да назардан тыс қалдырмадық. Ауылда 2 мектеп пен 3 балабақша жұмыс істейді. Жаңартылған оқу кабинеттері мен заманауи техникамен жабдықталған сыныптар оқушылардың сапалы білім алуына септігін тигізуде. Сондай-ақ ауыл мектептерінде спорттық және шығармашылық үйірмелер ашылып, балалардың жан-жақты дамуына көңіл бөлінуде. Мектептеріміздің материалдық базасы жаңартылып, балабақшаларда орын саны көбейтілді.  Денсаулық сақтау саласында да бірқатар оң өзгеріс бар. Ауылдағы медициналық пункт заманауи құрал-жабдықтармен жабдықталып, дәрігерлердің кәсіби біліктілігін арттыруға бағытталған курстар ұйымдастырылды. Алдағы уақытта жаңа медициналық орталық салу жоспарланып отыр, – дейді Н.Аманбекұлы.

Қазіргі таңда ауылда 4 410 тұрғын тату-тәтті тұрмыс кешуде. Тұрғындардың көбі ауылшаруашылығы, білім, денсаулық сақтау және кәсіпкерлік салаларында еңбек етеді.

Ауыл инфрақұрылымы да жыл санап дамып келеді. Бүгінде көшелердің 99 пайызы асфальтталған, көшелер самаладай жарқырап тұр. Таза ауызсу мәселесі кезең-кезеңімен шешілуде. Өткен жылы Түктібай ауылына ауылішілік ауызсу құбыры тартылып, 143 аулаға ауызсу кіргізілген. Ал биыл Қазбастау разъезіне су жеткізу көзделген.

– Соңғы 2 жылда біз ауыл ішіндегі барлық көшелерді асфальттадық. Көшелеріміздің бәрі жарықтандырылған. Электр желілерін жаңғырту жұмыстары да жалғасып жатыр. Тұрғындарды таза ауызсумен қамту мәселесі де назарымыздан тыс қалған емес. Биылдың өзінде бірнеше үйге су тартылды. Алдағы уақытта бұл жұмысты толық аяқтауды көздеп отырмыз. Сол секілді көлік қатынасын жақсарту мақсатында аудан орталығымен байланыстыратын жолдарға жөндеу жұмыстары жүргізілуде. Жол бойында сервистік кешендер мен демалыс орындары ашылып, ауыл тұрғындары мен жолаушылар үшін қолайлы жағдай жасалуда, – деп атап өтті Нұрсұлтан Аманбекұлы.

Нұрлыкент ауылдық округі – аграрлық аймақ. Мұнда 60-тан аса шаруа қожалық тіркелген. Шаруаларға тұрақты түрде қолдау көрсетіліп тұрады. Кезең-кезеңімен кәсіпкерлер мен тұрғындарға жеңілдетілген несиелер ұсынылып, жаңа техникалар сатып алынуда. Биыл ауылшаруашылығы техникаларын жаңарту мақсатында 60 миллион теңгеден аса қаржыға бірнеше жаңа трактор мен қосалқы құрал-жабдықтар алыныпты. Бұл жұмыстардың барлығы ауылды дамытуға бағытталған нақты қадамдар.

Өз кезегінде ауыл тұрғындары да кәсіпкерлікті дамытуға белсенді атсалысып, мемлекеттік қолдаудың арқасында жаңа жобалар іске асуда. Жақында ауылда құс фермасы ашылып, ет және жұмыртқа өндірісі жолға қойылған.

– Ауылда кәсіпкерлер саны жылдан-жылға артып келеді. Кәсіпкерлерге жан-жақты қолдау көрсетілуде. Бұған қоса, ауылда шағын дүкендер мен қызмет көрсету орындары көбейіп, халыққа қажетті тауарлар мен қызметтер ұсынылуда. Жергілікті кәсіпкерлер ауылшаруашылығы өнімдерін қайта өңдеу және сақтау бағытында жаңа жобаларды қолға алуда. Мұның барлығы ауыл экономикасына оң ықпал етеді, – дейді Н.Рақымбек.

Ел болашағы – жастардың қолында. Сондықтан ауылда спорттық секциялар, мәдени үйірмелер көптеп ашылып, жастардың бос уақытын тиімді өткізуіне жағдай жасалуда.

– Жастар – қоғамның қозғаушы күші. Жастарға дұрыс бағыт-бағдар берсек, ауылды дамыту ісіне белсенді араласатынына сенемін. Осы мақсатта спорттық орталық аштық, мәдени үйірмелердің санын арттырдық. Қазір ауылдағы 174 бала спортпен және шығармашылықпен тегін айналысуда. Алдағы уақытта шахмат және ағылшын тілі курстары ашылады, – дейді ауылдық округ әкімі.

Жуырда ауылда жаңа мешіт ашылып, тұрғындардың рухани өміріне оң әсерін тигізді. Сонымен қатар, мәдениет үйінде түрлі концерттер мен іс-шаралар ұйымдастырылып, ұлттық дәстүрлерді насихаттау жұмыстары жүргізілуде.

Нұрлыкент ауылдық округінде алдағы жылдары бірқатар ірі жобалар жүзеге аспақ. 2025-2027 жылдары «Алтын Ел-груп» жауапкершілігі шектеулі серіктестігі құс етін өндіру және өңдеу фабрикасын салмақ. Бұл жоба іске асқан кезде 50 ауыл тұрғыны тұрақты жұмыспен қамтылады.

Ауылдың дамуы – елдің дамуы. Жергілікті билік пен тұрғындардың бірлескен еңбегінің арқасында ауыл жылдан-жылға көркейіп, халықтың өмір сүру сапасы жақсаруда.

Бақытжан БЕКБОЛАТ,

журналист,

Жуалы ауданы