Осы орайда облыс әкімі Ербол Қарашөкеев кеше Мойынқұм ауданына жұмыс сапарымен барып, тұрғындардың талап-тілегін тыңдады. Аудандық мәдениет үйінде өткен кездесуде халықтың көкейіндегі өзекті мәселелердің шешілу жолдары қарастырылды.

Ербол Шырақпайұлы алдымен өңір экономикасының даму көрсеткіштерін баяндап, биыл жүзеге асырылатын жоспарлы жұмыстарға тоқталды.

– Былтыр барлық деңгейдегі әкімдердің тұрғындармен 759 кездесуі өтсе, онда көтерілген 2 754 мәселенің 2 059-ы шешімін тауып, 695-і бақылауға алынды. Осы кездесулердің 18-і облыс әкімінің, 323-і аудан және қала әкімдерінің қатысуымен өтті. Бұл бағыттағы жұмыстар жалғасын табуда. Президент Қасым-Жомарт Тоқаев 28 қаңтарда өткен Үкіметтің кеңейтілген отырысында ел дамуының басым бағыттарын айқындап берді. Бұл – ірі инфрақұрылым жобалары, цифрландыру және жасанды интеллект, ядролық энергетиканы дамыту, агроөнеркәсіп кешенін нығайту және инвестиция тарту мәселелері. Бұған қоса атқарылуы тиіс жұмыстардың қатарында әлеуметтік саланы қолдау, білім, денсаулық салаларын дамыту, ел азаматтарын толғандыратын мәселелерді шешу секілді шаруалар да бар, – деді Ербол Шырақпайұлы.

Жиында баяндама жасаған Мойынқұм ауданының әкімі Ермек Карентаев аймақтағы өнеркәсіп өндірісі 2024 жылдың қаңтар-желтоқсан айларында 117 миллиард теңгені құрап, 2023 жылдың тиісті кезеңімен салыстырғанда 15,1 миллиард теңгеге артқанын, нақты көлем индексі 100,1 пайызға орындалғанын жеткізді. Былтыр қол жеткізілген жетістіктер мен 2025 жылға жоспарланған жұмыстар ретін сөз еткен Ермек Амангелдіұлы: «Аудан орталығындағы Амангелді көшесінің кіреберісіндегі ауылдың келбетін бұзып тұрған қираған, қисайған шарбақтардың орнына заманауи еуро стилдегі қоршау орнату, Амангелді көшесіндегі көпқабатты 6 үйдің сыртқы келбетін әрлеу, аумағын абаттандыру, балалар ойын алаңын салу, осы көшенінің бойында орналасқан Ұлы Отан соғысы ардагерлерін еске алу обелискісін қайта жаңғырту бойынша бюджеттен 150 миллион теңге бөлінді. Сонымен қатар аудан орталығы Мойынқұм ауылына кіреберіс аркадан бастап Амангелді көшесінің бойында орналасқан полиция ғимаратына дейінгі автомобиль жолын кеңейтіп, оны екіге бөліп, абаттандыру бойынша үлкен жоба әзірленуде», деді.

Сондай-ақ Бірлік ауылында орналасқан орталық саябақты абаттандыруға аудандық бюджеттен 83 миллион теңге және Биназар ауылында орналасқан орталық саябақты абаттандыруға 15,3 миллион теңге бөлініп, жұмыстар басталыпты.

Өз кезегінде аймақ басшысы халықты тұрақты жұмыспен қамтитын кәсіпорындардың құрылуын басты назарда ұстауды, сондай-ақ Мойынқұмда үлкен кен орындары бар екенін, алайда оны игеруде іс дұрыс жүргізілмей жатқанын баса айтты. Сонымен қатар жаңа жұмыс орындарын құру, нәтижелі көрсеткіштерге қол жеткізу үшін халықтың әл-ауқатын жақсарту бағытындағы жұмыстарды жаңғырту қажеттігіне тоқталды.

– 2023 жылы аудандарда және ауылдық жерлерде ангар типті спортзалдар салу жоспарланған болатын. Елді мекендердегі спортзалдарға көңіл бөлу, яғни спорт кешендерін салу тапсырмасы назардан тыс қалмауы шарт. Халықтың денсаулығын нығайту барысында спорттық құрылымдар жүйесін арттыру көзделген. Осы тапсырмаға сәйкес құжаттама дайындау үшін Күшаман ауылына аудандық бюджеттен 9 миллион 700 мың теңге бөлінді. Ал жалпы сомасы 220 миллион теңгені құрап отыр, – деген облыс әкімі бұған дейін көтерілген мәселелердің қалай шешімін тауып жатқанына, берілген тапсырмалардың орындалуына назар аударып, Бірлік-Мойынқұм автожолының шұрық-тесік жолын сынға алды.

– Мойынқұм-Ұланбел жолының жағдайы қандай деңгейде екенін көрдік. Жол өте нашар. Мойынқұмның өзінде құрылыс материалдары тапшы болғандықтан қажетті құрылыс заттарын сырттан алып келуге тура келеді. Сондықтан бір шақырым жол 15-20 пайызға қымбатқа түседі. Осындай түйткілдерді шешу үшін уақытында тиісті тапсырмалар берілген болатын. Тапсырмалар қалай орындалуда? Жол мәселесі бойынша тиісті құжаттар дайындалды ма? – деді облыс әкімі.

Облыс әкімдігі жолаушылар көлігі және автомобиль жолдары басқармасының басшысы Мұрат Саурықовтың айтуынша, Бірлік-Мойынқұм-Ұланбел автожолының Мойынқұмға дейінгі аралығындағы 26 шақырымын жөндеу бағытында тиісті жұмыстар жүргізілуде. Сәуірдің 25-іне дейін сараптама қорытындысы алынады екен.

Облыс әкімі өз сөзінде көктемгі дала жұмыстарына дайындық барысына да назар аударды. Мойынқұм ауданы бойынша суармалы егістік алқабы 6 725 гектарды құрапты. 2025 жылы егістік алқабын 64 пайызға игеру жоспарланған. Бүгінгі таңда жауапты науқанға қажетті ауылшаруашылығы техникалары, тұқым және дизель отыны толық дайындалған.

Облыс әкімі ауданда бос жатқан суармалы егіс алқаптары болса ондай жерге жүгері егу табыс әкелетінін сөз етті. Себебі жақында Шу ауданында жүгеріден әртүрлі өнім шығаратын үлкен кәсіпорын іске қосылатын көрінеді. Зауыттың әлеуеті жылына 3 миллион тонна жүгері қабылдауға жетеді. Яғни өнімді өткізуде ешқандай мәселе туындамайды.

Жалпы былтыр ауданда 3 566 гектарға егіс егіліп, 10 550 тонна өнім алынған. Биыл егіс көлемі 4 708 гектарға жетіпті. Жоспар бойынша 14 100 тонна өнім алынбақ.

Әр салада атқарылуы тиіс жұмыстар екшелгеннен кейін кезек сұрақ-жауапқа берілді.

– Аудандағы аурухана мәселесіне келетін болсақ, жағдайымыз мәз емес. Ауыра қалсақ науқастарды Шу ауданына жібереді. Мәселеміз шешілмей, кейде түнеуімізге тура келеді. Аудандық аурухананы компьютерлік томография мен магниттік-резонанстық томографиямен жабдықтауға ықпал етуіңізді сұраймын – деді зейнеткер Ғаният Қашқымбеков.

Компьютерлік томография аппаратын сатып алу 2026 жылға жоспарланыпты. Ал магниттік-резонанстық томография мәселесін алдағы бір-екі айда шешу жайы қарастырылатын болды.

– Келешек балалардың қолында. Сол болашақ ұрпақтың өмірі жарқын болсын деген ниетпен бүгінде жайлы мектептер көбеюде. Біздің аудан орталығы Мойынқұм ауылында да сондай бір жайлы мектеп интернатымен қоса салынса деген тілегім бар. Себебі маңайдағы ауылдардағы мектептердің кейбірі 4 сыныптық. Сол кезде ол елді мекендегі балалардың аталған жайлы мектепте толыққанды білім алуына мүмкіндік туар еді. Одан бөлек Мойынқұм колледжін қалпына келтіруді, онда бетон құюшы, сылақшы, механизатор, дәнекерлеуші секілді жұмысшы мамандарды дайындалса нұр үстіне нұр болар еді, – Мойынқұм ауылының тұрғыны Мұратхан Естаев.

Аудандық мәслихаттың депутаты Бекболат Өткелбаевтың айтуынша, мойынқұмдық жастар отбасын құрып, тұрғын үй салайын десе жер жоқ. Б.Өткелбаев облысымыздағы жер көлемі жағынан ең үлкен ауданда үй салатын жердің табылмауы, табылған жердің бұған дейін басқа мақсатта пайдалануға жоспарланғаны жанына бататынын жеткізді. Облыс әкімі мән-жайға қаныққан соң аудан әкіміне тиісті тапсырма берді. Білгеніміздей бүгінде Мойынқұм ауылының айналасы Бас жоспар бойынша жасыл желекке арналған екен. Е.Карентаев жыл соңына дейін аталған аумақ үй саламын деген тұрғындар үшін қарастырылатынына уәде берді.

Жамбыл ауылдық округінің «Жексембай» мешітінің имамы Ұзақбай Бадықов ауызсу мәселесін көтерді.

– Ауылдық округтің ауыз су ғимараты 2009 жылы салынған. Қазіргі танда ауызсу резервуары тесілген, толық су жинауға мүмкіндігі жоқ. Ауылдағы 7 көшенің О.Баубеков, Т.Байғожаев, Б.Аманжолов көшелеріне мүлдем су бармайды. Қазіргі танда ауданнан трактормен су тасымалдануда. Ж.Қуанышбаев көшенің бас жағына ауызсу жетпейді. Сонымен қатар судың айналымы жоқ, құбырлары шіріген, су құбырының тозығы жеткен. 2009 жылы колданысқа берілген ауызсу жүйесіне жөндеу жұмыстары жүргізілмегендіктен жобалаушы «General Parthers» жауапкершілігі шектеулі серіктестігінің мамандарымен зерделеу жұмыстары жүргізілді. Нәтижесінде Жамбыл ауылының инженерлік схемасына сәйкес сумен жабдықтау желілерін кайта құру олардың конфигурациясын, төсеу принциптерін, өткізу қабілетін және басқа сипаттамаларын өзгертуді қамтығандықтан, ауызсу желілерін күрделі жөндеуден өткізу туралы шешім қабылдаған. Бүгінгі таңда ауызсу ауыл тұрғындарына күніне 40 минут ғана беріледі. Ауызсудың жетіспеушілігі жоғарыда айтылған кемшіліктерге байланысты. Аудан әкімдігінің тұрғын үй коммуналдық шаруашылық, жолаушылар көлігі және автомобиль жолдары бөлімінің мамандары келіп, әр көшенің су жүйесінің бойына тексеру жұмыстарын жүргізуде. Барлығы 7 көшенің бүгінгі таңда алтауына тексеру жүргізіліп, сәyip айының жетісіне дейін аяқталу жоспарлануда. Сәуір айының 8-і күні толық жүйеге тексеру жүргізіледі, – деді тұрғынның сұрағына жауап берген Жамбыл ауылдық округінің әкімі Ақсана Қалыбаева.

Сонымен қатар Биназар ауылының тұрғыны Еркебек Ошақбаев шабындық жетіспейтінін, Биназар каналына су салу мәселесін Ғибадат Құрманәлиев, қоқыс, жарық, коммуналдық қызмет, көпқабатты тұрғын үйді жаңғырту қажеттігін Жетібай Мұсаев, Тұлпарсаз шабындығына су шығару, шабындықты қалпына келтіру, оны жайылымға айналдыруды Қанатбек Серікбаев мәселе етіп көтерді. Бұдан да басқа бірқатар тұрғындардың уәжі тыңдалып, тұшымды жауаптар берілді.

Жиын барысында облыс әкімі тұрғындар өтінішіне орай аудан әкімі Ермек Карентаев бастаған жауаптыларға арнайы тапсырмалар жүктеді. Кейбір мәселелер хаттамаға енгізіліп, алдағы уақытта тиісті шаралар қабылданатын болды. Аудан тұрғындарымен болған кездесуден кейін Е.Қарашөкеев азаматтарды жеке сұрақтарымен қабылдап, одан кейін аудан аумағындағы бірқатар өндіріс орындарының жұмысымен танысты.

Нұрым СЫРҒАБАЕВ,
Мойынқұм ауданы