Қазақстанда мектепке дейінгі білім беруді ваучерлік қаржыландыру жүйесі кең ауқымда енгізілуде. 2024 жылдан бастап бұл механизм Тараз, Түркістан, Шымкент, Орал және Астана қалаларында сәтті жүзеге асырылды. 2025 жылдың наурыз айынан бастап жобаға Семей, Өскемен, Жезқазған, Қарағанды қалалары, сондай-ақ Байзақ және Сарыағаш аудандары қосылды.

«Бұл механизм мемлекеттік қызметтерді ашық және тиімді көрсетуге, және мектепке дейінгі ұйымдар арасында мемлекеттік тапсырысты бөлуге бағытталған. Жаңа жүйенің негізгі артықшылығы - балабақшалар арасындағы салауатты бәсекелестік және ата – аналарға арналған білім беру мекемесін таңдау еркіндігі есебінен қызмет көрсету сапасын арттыруда», — дейді Мектепке дейінгі білім департаментінің директоры Манара Адамова.

Айта кету керек, ваучерлік қаржыландырудың пилоттық жобасын іске асырудың арқасында Тараз қаласының балабақшаларына кезек 12 есеге – 24 мыңнан 2 мыңға дейін, ал Түркістанда – 5 есеге-850-ден 169-ға дейін қысқарды. Осындай жағдай басқа аймақтарда да байқалады. Жобаны биылғы жылдың соңына дейін басқа өңірлерде де масштабтау жоспарлануда.