Ал осы жылдың 3 айында осындай 5 қылмыстық іс тіркелген. Жалпы соңғы үш жылда қаржы пирамидаларының әрекетінен облысымыздың 200-ден астам азаматы зардап шеккен. Дегенмен бұл экономикалық тергеп-тексеру департаментіне өтініш білдірген адамдардың саны ғана. Бұл туралы өңірлік коммуникациялар қызметінде «Көлеңкелі экономикаға қарсы күрес бағытында атқарылған іс-шаралар» тақырыбында өткен баспасөз мәслихатында айтылды.

Облыс бойынша экономикалық тергеп-тексеру департаментінің қызметкері Жағыпар Исатаевтың айтуынша, 2023-2024 жылдар аралығында департамент арқылы қабылданған іс-шаралар нәтижесінде алаяқтардан зардап шеккен азаматтарға 45 миллион теңгеден аса келтірілген залал өтеліпті. Мысалы, «Chia Tai» қаржылық пирамидасын ұйымдастырушыға қатысты қылмыстық істі тергеу барысында сатып алынған пәтер түріндегі мүлік пен 10 миллион тенгеден аса қаражат тәркіленген. Әдетте ірі алаяқтық ұйымдар өздерінің қылмыстық схемаларын бүкіл республика аумағында жүзеге асыратын көрінеді.

– Біздің облыстағы өзекті мәселенің бірі – жанар-жағармайды Қырғызстанға заңсыз шығаруға қарсы күрес. Аталған мәселені шешу мақсатында «Переток» жедел-профилактикалық іс-шарасын өткізу алгоритмі әзірленді. Жедел-профилактикалық шараның нәтижесінде жанар-жағармайды сыртқа шығару 65 пайызға азайды. Қабылданған шаралар арқасында өңірде мұндай отын түрлерінің тапшылығына жол берілмей, диқандардың уақытылы егін жинау жұмыстарына оң әсерін тигізді – деді Жағыпар Қожахметұлы.

Сондай-ақ спикер «көлеңкелі» экономикаға қарсы күрестің құрамдас бөлігі акцизделетін, яғни контрафактілі өнімдердің заңсыз айналымы екенін тілге тиек етіп, бұл бағытта да атқарылған жұмыстар жайын баяяндады. Өткен жылы 5 миллиард теңгеден асатын акциздік өнімдердің заңсыз айналымы бойынша 22 қылмыстық іс тіркеліп, 7 миллион қорап көлеміндегі темекі тәркіленіп, заңсыз айналымынан шығарылыпты. Ал оның акциз сомасы 2 миллиард теңгені құраған.

Н.БОЛАТҰЛЫ