Deutsche Welle басылымының мәлімдеуінше, Даниядағы әскери міндеттілік еріктілердің жетіспеушілігін толтыру мақсатында енгізілген және лотерея жүйесі арқылы жүзеге асырылады.

2025 жылдың 1 шілдесінен бастап 18 жасқа толған дат әйелдері әскерге шақырылады. Бұл шешім бастапқыда 2027 жылға жоспарланған, алайда енгізу мерзімі екі жылға ертерек жүзеге асырылатын болды.

Қорғаныс министрі Троэлс Лунд Поульсеннің айтуынша, қазіргі қорғаныс және қауіпсіздік жағдайына байланысты қарулы күштерге көбірек адам тарту қажет. Сондай-ақ, ерлер мен әйелдер үшін әскери міндеттілік теңдей енгізілетінін атап өтті.

Данияда міндетті әскери қызмет еріктілердің саны жеткіліксіз болған жағдайда ғана жүзеге асырылады. Әскерге шақырылатын азаматтар жыл сайынғы лотерея арқылы анықталады. Қазіргі уақытта дат әйелдері әскерде тек ерікті түрде қызмет етеді.

Бұл шешім Данияның қорғаныс әлеуетін арттыруға бағытталған маңызды қадамдардың бірі болып табылады.