Театр – адам жанының айнасы, ой мен сезімнің үйлесімі, қоғамның мәдени дамуына ықпал ететін ұлы өнер.

«Қазақстанда театр өнеріне қызығушылық артып келеді. Зал көрерменге толы, қойылымдардың премьерасына билеттер екі-үш апта бұрын сатылып кетеді. Сахна өнеріне құштар жандардың арасында жастардың көп болуы көңілге ерекше қуаныш ұялатады», – деп атап өтті Президент Қасым-Жомарт Тоқаев IV Ұлттық құрылтай отырысында.

Қазіргі уақытта елімізде 70 театр жұмыс істейді, олардың 57-сі мемлекеттік. Соңғы төрт жылда 5 жаңа мемлекеттік театр ашылған. 2024 жылы 396 гастрольдік сапар ұйымдастырылса, оның 46-сы шетелде өтті.

Қазақстанның театрларында 9 мыңға жуық маман еңбек етсе, оның 4 200-і шығармашылық ұжым өкілдері. Өткен жылы 200-ден астам жаңа қойылым сахналанып, оның 107-сі отандық авторлардың шығармалары негізінде қойылды.

Дүниежүзілік театр күніне орай сахнада және сахна сыртында қызмет ететін барша мамандарға алғыс білдіріледі. Театр – рухани даму мен мәдениеттің маңызды бөлшегі, сондықтан оның дамуы қоғам үшін үлкен маңызға ие.