Бүгінде қазақ тілі – тәуелсіз елдің мемлекеттік тілі. Оның мәртебесі заңмен бекітілген, қоғамның барлық саласында қолданылуы үшін мүмкіндіктер жасалуда. Мемлекеттік басқару ісінде, білім беру жүйесінде, мәдениет пен өнерде, ақпарат құралдарында қазақ тілінің қолданыс ауқымы кеңейіп келеді. Қазақша оқитын балалардың саны жылдан-жылға артып, қазақ тілді мектептер мен жоғары оқу орындары көбейіп келеді. Радио мен телеарналарда, интернет кеңістігінде қазақша контентке сұраныс өсіп, жас буын ана тілінде ақпарат алуға дағдылана бастады. Бұл – қазақ тілінің болашағы жарқын екенін көрсететін жағымды үрдіс.

Дегенмен тілдің дамуы тек заңмен бекітілетін құбылыс емес. Оны шын мәнінде жандандыратын – халықтың өзі. Тілдің шынайы тіршілігі оның күнделікті өмірде қаншалықты белсенді қолданылатынына байланысты. Қазақ тілі тек отбасыда ғана емес, бизнес пен ғылымда, технология мен халықаралық қарым-қатынастарда, әлеуметтік желілер мен шығармашылық ортада кеңінен қолданылуы керек. Біздің қоғамда қазақ тілінің сұранысын арттыру үшін әрбір азамат өзінің күнделікті өмірінде оны қолдануға бейімделуі тиіс. Ана тілінде сөйлеу – тек міндет емес, бұл – ұлттық сана-сезімнің көрсеткіші, елге деген құрметтің белгісі.

Қазақ тілінің өрісі кеңеюі үшін оның заманауи өмірдің барлық саласына енуі аса маңызды. Бүгінгі таңда әлемдік инновациялардың, технологиялық дамудың, ғылыми зерттеулердің басым бөлігі ағылшын тілінде жүргізіледі. Осы ретте қазақ тілі де ғылыми ойлаудың, интеллектуалдық дамудың, жаңа технологиялардың тіліне айналуы тиіс. Біз өз тілімізде сапалы білім беріп, жоғары деңгейлі ғылыми еңбектер жазып, технологиялық өнімдерді қазақша жасасақ, тілдің құндылығы арта түседі.

Бүгінгі жастар – қазақ тілінің нағыз тірегі. Олар жаңа медианың, ақпараттық технологияның, шығармашылық индустрияның тетігін ұстап отыр. Қазіргі таңда қазақ тілінде сапалы видеолар түсіретін блогерлер, қазақша подкаст жүргізетін журналистер, қазақ тілінде жазатын жазушылар мен ақындар көбейіп келеді. Бұл – қуантарлық жағдай. Себебі тілді насихаттау тек дәстүрлі жолмен ғана емес, оны заманға сай әртүрлі құралдар арқылы дамыту арқылы жүзеге асады. Қазақ тілі әлеуметтік желілерде, интернетте, ойын индустриясында, кино мен театрда, өнер мен бизнесте мықты орын алса, оның болашағына алаңдаудың қажеті болмайды.

Біздің басты мақсатымыз – қазақ тілін тек Қазақстанда ғана емес, әлемдік деңгейде мойындалатын, халықаралық қарым-қатынаста сұранысқа ие тілге айналдыру. Бұл үшін, ең алдымен, әр қазақ өз тілінің мәртебесін жүрегімен сезініп, оны өмірінің ажырамас бөлігіне айналдыруы тиіс. Егер әрбір азамат өз ісінде, кәсібінде, күнделікті қарым-қатынасында қазақ тілін бірінші орынға қойса, онда оның болашағы жарқын болатыны сөзсіз.

Қазақ тілі – өткеннің жәдігері ғана емес, келешектің кемелі. Ол – ұлттың айбыны, елдің айнасы, Мәңгілік елдің мәңгілік тілі. Ендеше, ұлттың болашағына бейжай қарамайтын әр азамат өз тілін ардақтап, оны дамытуға атсалысуы қажет. Қазақ тілінің көсегесін көгерту – жалғыз биліктің емес, бүкіл халықтың міндеті. Бұл – ұрпақ алдындағы, тарих алдындағы жауапкершілігіміз.

Сымбат ҚУАНЫШ