Сарбаздар көкпар тартып, аударыспақ ойнап, теңге іліп, қыз қууға қатысты. Әр сайыс жігіттердің білек күші мен жүректілігін, ат үстіндегі ептілігін сынады.

– Жауынгерлер әскери міндетін атқарып қана қоймай, ұлттық мерекелерді де тойлап, қашанда қазақы дәстүрімізді қастерлеп жүреді. Биылғы Наурызнама онкүндігіндегі Ұлттық спорт күнін де өзгеше сән-салтанатпен атап өттік. Сарбаздарымыз ат үстінде атой салып, жаттығу алаңын думанға бөледі. Мұндай іс-шаралар жауынгерлік рухты көтеріп қана қоймай, ұлттық құндылықтарымызды жаңғыртуға мүмкіндік береді, – дейді «Оңтүстік» өңірлік қолбасшылығы тау-егерлік полкінің командирі, подполковник Алмас Отыншынов.

Мерекенің сәнін таулы-егерлік полкте қызмет ететін сарбаз қыз-келіншектер кіргізе түсті. Олар ұлттық нақыштағы камзолдарын киіп, дала төсінде бауырсақ пісіріп, Наурыз тойының шырайын аша түсті.

Жауынгер қыз-келіншектер атқа қонып, қыз қууға шыққанда жігіттер біраз әбігерге түсті. Дала төсінде құйғыта шапқан бойжеткендерді қуып жету оларға оңайға соқпады. Нағыз жігіттің жігері сыналар ойында ер-азаматтар да өз есесін жіберіп алмады.

Осылайша полигон бір күнге ұлттық ойын алаңына айналып, сарбаздар нағыз додада шынықты. Әр ойын намысты қайрап, рухты күшейтті.

– Әскерге келгенге дейін атқа мініп көргенім болмаса, мұндай сынға түспеген едім. Мұнда нағыз ердің мектебінен өттік. Жорықта да, жаттығуда да ат үстінде шынығып жүрміз. Бұл күн ерекше әсер сыйлады, – дейді мерзімді қызметтегі сарбаз Диас Талғат.

Ақтоты БЕКЕНҚЫЗЫ