ҚР Туризм және спорт министрлігінің Туризм индустриясы комитеті 2025 жылдың 20-25 наурызы аралығында туристік «Jibek joly» пойызының кезекті сапары жоспарланғанын айтқан болатын. Осыған орай «Алматы-Түркістан-Ташкент-Самарқан-Тараз-Алматы» бағытында ұйымдастырылған туристік пойыз шаһарымызға келіп, қонақтар қаланың тарихи-мәдени орындарын аралады.

– «Jibek joly» пойызының туристік сапарына қатысушыларды салтанатты күтіп алу рәсімі жоғары деңгейде ұйымдастырылды. Оларға аймақтың тарихи-мәдени мұраларын таныстыру мақсатында жан-жақты ақпараттық-танымдық шаралар өткізілді. Туристер Тараз қаласына жеткенге дейін Қазақстанның бірнеше ірі қаласында аялдап, сондай-ақ көршілес Өзбекстанның Ташкент және Самарқан қалаларына сапар жасап, көне өркениет ошақтарымен танысты. Жалпы бұл ерекше туристік пойызбен 312 адам келді. Олардың басым бөлігі, яғни 300-і Қазақстан азаматтары болса, қалған 12-сі алыс және жақын шет мемлекеттерден келген шетелдік саяхатшылар, – дейді облыс әкімдігі кәсіпкерлік және индустриалды-инновациялық дамыту басқармасы басшысының орынбасары Гұлнұр Қойшыбекқызы.

Айта кетейік, «Jibek joly» пойызының алғашқы рейсі 2024 жылдың 16-20 қарашасы аралығында ұйымдастырылып, саяхат бағыты Түркістан, Ташкент және Самарқан қалаларын қамтыған. Екінші сапар 2025 жылдың 2-7 қаңтары аралығында ұйымдастырылып, маршрутқа қосымша Шымкент, Өзбекстанның Самарқан қалалары енгізілді.

– «Jibek joly» туристік маршрутымен бірге бірнеше қаланы аралап, кең-байтақ өлкеміздің аса бай тарихи-мәдени мұрасымен тереңірек танысу мүмкіндігіне ие болдық. Осы сапар аясында сан ғасырлық тарихы бар қасиетті жерлерді көзбен көріп, ұлттық құндылықтармен етене жақын танысып келеміз. Бүгін ежелгі Тараз шаһарына табан тіреп, бала күнімізден құлағымызға жаттанды болған бұл өңірдің әулиелі мекен екендігін тағы бір мәрте сезіндік. Қаланың тұрғындары өздерінің ата-бабадан мирас болып қалған қонақжайлылық дәстүрінен жаңылмай, бізді зор ықыласпен, ерекше сән-салтанатпен қарсы алды, – дейді Қарағанды қаласының тұрғыны, турист Сырлыбек Жолмағанбетов.

Келген қонақтар үш топқа бөлініп, Тараз қаласындағы «Көне Тараз» тарихи-этномәдени кешені, облыстық тарихи-өлкетану мұражайы, Ерте ислам мешіті және Қарахан, Айша бибі, Бабажа хатун кесенелерімен танысып шықты.

Мүқағали БАЛТАБАЕВ