Су ресурстарын сақтау және үнемдеу – әр қазақстандықтың борышы. Су – ел экономикасының қозғаушы күші әрі экожүйенің маңызды элементі.

Су ресурстары және ирригация министрлігі су үнемдеу мәдениетін дамыту үшін жұмысты жалғастырып келеді. Былтыр Су ресурстарын басқарудың 2024-2030 жылдарға арналған тұжырымдамасы іске қосылды. Түркістан облысында екі жаңа су қоймасы салынып, тағы 6 су қоймасын салу мен реконструкциялау жоспарланған.

Биыл министрлік 423 мың тұрғыны бар 153 елді мекенді сапалы ауызсумен қамтамасыз ету үшін 8 топтық су құбыры жобасын аяқтайды. 256 мың гектар жерге суару жүйесі енгізіліп, 1953 шақырым суару каналы пайдалануға беріледі.

Қазақстанда су үнемдеуді ынталандыру үшін ауылшаруашылық алқаптарында жаңбырлатып және тамшылатып суару жүйелері қолданылады. Су ресурстарын қорғау мен үнемдеу бойынша жаңа Су кодексінің жобасы Парламентке енгізілді.

Цифрландыру және автоматтандыру есебінен су есебін жақсарту жоспарлануда. Қызылорда мен Түркістан облыстарында суды есепке алу жүйесі автоматтандырылып жатыр.

Министрлік 2024-2026 жылдарға арналған су үнемдеу жол картасын әзірлеп, су заңнамасын жетілдіру және жаңа технологияларды енгізу бойынша шаралар қабылдауда.

«Су ресурстарын үнемдеу, еліміздің болашағы үшін жауапкершілікті сезіну – әрқайсымыздың міндетіміз», – деді Су ресурстары министрі Нұржан Нұржігітов.