Кеш шымылдығын «Бастау» студиясының «Bala dance» тобы қазақ биімен ашып, көрермендерге ерекше әсер сыйлады. Кітапханашылар Наурыз мерекесіне орай түрлі салт-дәстүрлерді сахналық көрініс арқылы көрсетті. Сонымен қатар, «Tumar» студиясының домбырашылары мен «Қарақат» мектеп-студиясының дәстүрлі әншілері өз өнерлерін паш етіп, кештің сәнін кіргізді.

Бұл кеште ұлттық құндылықтарды дәріптеуге ерекше көңіл бөлінді. Жас оқырмандарға халқымыздың тарихы, дәстүрлері мен көне мұралары туралы кеңінен баяндалды. Жиынға белсенді қатысушылар арнайы сыйлықтармен марапатталды. Бұл олардың ұлттық мәдениетке деген қызығушылығын арттыруға септігін тигізді.

Бағдарлама соңында арнайы шақырылған «Мейірім» мектеп-интернатының балаларына арнап дастарқан жайылып, қазақтың қонақжай дәстүріне сай наурыз көже ұсынылды. Бұл іс-шара оларға ерекше қуаныш сыйлады.

– Мұндай іс-шара біздің кітапханада жыл сайын ұйымдастырылып келеді. Былтыр біз «Өмірлік қиын жағдайдағы балаларды қолдау орталығының» тәрбиеленушілерін шақырсақ, биыл «Мейірім» мектеп-интернатының балаларына арнап кеш өткіздік. Ұлттық құндылықтарымызды ұмытпау, жас ұрпақты қазақы дәстүрде тәрбиелеу – басты мақсатымыз, – дейді Д.А.Қонаев атындағы облыстық балалар мен жасөспірімдер кітапханасы директорының орынбасары Жанат Тұрлығұлова.

Мерекелік кеш соңында кітапханашылар өнер көрсеткен қатысушылар мен өнерпаздарға алғыс хат табыстап, арнайы естелік сыйлықтар ұсынды. Сонымен қатар, іс-шара аясында қазақ халқының салт-дәстүрлері, ұлттық ойындары және көне жәдігерлері туралы мазмұнды кітап көрмесі ұйымдастырылды.

Анар ӘУЕСБЕК,
М.Х.Дулати атындағы Тараз
университетінің 4-курс студенті